كلنا بنحب نجدد في شكل البيت كل شوية، بس مش لازم نجدد يعني نغير العفش ونرمي القديم، ممكن بإضافات ذكية هتخلي شكل الصالة والانتريه كأنهم اتغيروا، وبحاجات نعملها إحنا بنفسنا وهتخليكِ تفخري بعفشك قدام ضيوفك. تعالوا نعرف طريقة تجديد شكل الصالة والانتريه بخطوة بسيطة؟
تجديد شكل الصالة والانتريه بخطوة بسيطة
الطريقة الأولى:
ممكن نغير السجادة نفسها، بس منروحش نشتري سجادة بـ 800 أو 900 جنيه، إحنا نعمل سجادة صوف جميلة متكلفناش 50 جنيه.
وطبعًا برضو نختار ألوان تليق على الانتريه، فمثلًا لو الانتريه لونه أحمر ممكن نعمل السجادة أسود في رمادي في أبيض، هتنطق الانتريه وتخلي لونه يبان. لو الانتريه موف “ممكن نخلي لون السجادة تدرجات لون الموف والروز”، هيبدي شكل جنان للانتريه.
الطريقة:
1- اشتري حوالي 10 بكرات صوف بالألوان اللي إنتِ تختاريها وتكون لائقة على انتريهك.
2- اشتري قطعة من قماش شبكة مفرغ بحجم السجادة اللي إنتِ عايزاها، وليكن “متر في 2 متر”.
3- على قطعة كرتون قصي شكل دايرة، ولفي حواليها الصوف عشان تعملي كور، هي اللي هتكون أساس للسجادة بالشكل اللي في الصورة.
4- وثبتي فيها خيط تقدري منه تخيطيها في الشبكة.
5- اعملي كمية كبيرة من الكرات الصوف بالألوان اللي إنتِ اخترتيها وخيطيها على الشبكة بالشكل المتناسق “مثلًا كورة حمرا وكورة سودا أو كورتين لون وبعدهم لون تاني”.
الطريقة الثانية:
لو عندك انتريه سادة وحاسة فيه بالملل، تعالوا نتعلم إزاي نعمل مخدات ورود أو ممكن قلوب ملونة تضيف شكل جميل وشيك للانتريه، وطبعًا تراعي تناسق الألوان “مثل لو انتريهك بني اعملي مخدات صفرا وبرتقالي، هتنور شكل الانتريه وتخليه كأنه جديد”.
إزاي؟
1- احضري ربع متر من كل لون إنتِ عايزاه، ولو عندك شوية إسفنج من مرتبة قديمة أو من مخدة اتبططت، خدي الفايبر اللي فيها واستخدميه.
2- قومي برسم باترون أو مجسم على ورقة لوح بالشكل اللي إنتِ عايزاه، عشان كل المخدات تطلع نفس الحجم ويبان منظرها الجميل.
3- احشيها بالفايبر أو الإسفنج أو ممكن بواقي قماش من عندك، وارجعي خيطيها وقفليها، ورصيها على الانتريه، هتلاحظي الفرق بنفسك، وكل ضيوفك هيحسوا بالتغيير.
