فى أمهات بتبقى عايزة ابنها هادى يفضل فى مكانه مايتحركش.وده مش صح، لان الطفل لما بيجى للحياة بيكون مش عنده اى خبرات وطبيعى يكتشف العالم اللى حواليه طيب إزاى نعمل توجيه سلوك الطفل من غير ضرب ؟
طبيعى حركته تبقى كتير،طبيعى لما يشوف حاجة ألوانها حلوة يمد ايده وياخدها،طبيعى يبقى عايز يلعب بكل حاجة عشان يتعرف عليها، وطبيعى وسط اكتشافه للعالم اللى حواليه ان حاجة تتكسر او تبوظ وطبعا مش بيبقى قصده انه يبوظ اللى حواليه، اللعب بالنسبة للطفل فى السنوات الاولى من عمره هو مصدر التعلُم فلازم تسبيه يلعب عشان يكتشف العالم حواليه فيكتسب فخبرات فيتعلم لكن وسط لعبه لازم توجهى سلوكه بأسلوب عقاب تربوى.
توجيه سلوك الطفل فى السنوات الاولى من عمره
أول سنتين من عمر الطفل
الطفل فى السن ده مش بيفهم الكلام..لكنه بيميز نبرة الصوت وتعبير الوش ونظرة العين اذا كانت حلوة (تعبر عن رضى)
او وحشة (تعبر عن غضب) بمعنى لو ابنك عمل غلطة وشافك مكشرة فى وشه أو لو قرب على حاجة وسمعك بتقولى (لا) بنبرة صوت حادة هيعرف ان فى حاجة مش طبيعية.
واستمرى بالاسلوب ده لحد ما يتم التلات سنين وهتلاقيه مع الوقت والتعود قبل ما يقرب لحاجة هيبصلك الاول وشوية شوية لما يبدأ يقول كلام بسيط هتلاقيه بيستأذن والاسلوب ده متجرب وفى امهات كتير بتعمل كده..
يعنى مش اسلوب مبتكر ده اسلوب طبيعى لكنه للأسف مش شائع زى الاساليب الغلط وهدفنا فى الصفحة اننا نخلى الاساليب الصح هى اللى شائعة والغلط هو اللى شاذ
تلات سنين ولحد أربع سنين
لما الطفل يبدأ يقول كلام بسيط ويبقى فاهم الكلام اللى بيتوجهله هنتعامل معاه بأسلوب عقاب يفهمه هو الخصام
وفى السن ده قبل العقاب لازم تكلم الطفل وتعرف منه الاول ليه اتصرف كدا وتعرفه الغلط من التصرف وتقوله انك هتخاصمه عشان اية وماننساش إننا نعاقب الطفل على الغلط.
وده اللى بيخلينا نعرف من الطفل قبل ما نعاقبه ايه الدافع من تصرفه عشان لو صح نشجعه.
ولو كان الدافع صح والتصرف غلط..نعرفه انه تصرفه هو اللى غلط والعقاب هيبقى على التصرف ونفهمه التصرف الصح يبقى ازاى وبعد كدا نعاقبه بالخصام. ونفضل فترة مانكلموش حسب غلطته.
ممكن نوعد ساعتين مانتكلمش معاه ولا نلاعبه ولا نحتك بيه.وحسب الغلطة بتزيد الفترة او بتقل
توجيه سلوك الطفل من غير ضرب
السن من خمس لسبع سنين
يكون الطفل كبر والعقاب يتغير بأسلوب جديد يناسب الطفل وهو الحرمان الحرمان من اللعب.الحرمان من أكلة بيحبها.
حرمان من فسحة. وبرضه لازم نعرف الطفل غلطه ونفهم سبب تصرفه.ويكون الحرمان حسب نوع الغلطة أعرف أم كانت بتعاقب ولادها بالحرمان من الاكل. وتسيب الولاد يجوعوا فترة معينة.(لكن ده فى السن الاكبر يعنى من 9 سنين فما فوق)
ونفضل مستمرين فى العقاب بالخصام كل الاساليب اللى فاتت دى بتجيب نتيجة فعالة فى توجيه سلوك الطفل ومش بتضر الطفل فى اى حاجة
لا ضرر جسدى ولا نفسى بعكس الضرب اللى بنستسهله ومش بيحسن سلوك الطفل وكمان بيضره بدنى ونفسى
مهم جدا – لو هتعاقب طفلك بالحرمان خد بالك أوعى تكون فترة الحرمان فترة ثابتة. بمعنى ابنك غلط فعاقبته بالحرمان من الشيكولاتة لمدة يوم.
وبعدين رجع عمل غلطة تانية فحرمته من اللعب لمدة يوم.غلط تانى فحرمته من الخروج لمدة يوم برضه.
كده الطفل هيتعود انه يغلط زى ماهو عايز لانه عارف ان الحاجة اللى اتحرم منها هترجعله تانى بعد فترة محددة هو عارفها يبقى لازم فترة الحرمان تبقى متغيرة.مرة نص يوم.مرة يوم.مرة يومين.وحسب نوع الغلطة
أوقات كتير لما بنعاقب أولادنا بيصعبوا علينا وبنروح نصالحهم تانى بسرعة ومانكملش عقابنا ليهم وده غلط، خليك ثابت على موقفك.
لو قولت لابنك انا هخاصمك ومش هكلمك النهاردة خالص يبقى لازم تعمل ده.
خد بالك ان ابنك مش هيسيبك تخاصمه..ممكن يوعد يعيط عشان يستعطفك ممكن يعمل اى حاجة عشان يجذب انتباهك ليه وتكلمه (ممكن لو مش بيتكلم تلاقيه اتكلم)
لو استجبت لتصرفات الطفل وماكملتش عقابك له ممكن بعد كدا يستغل ده..وكل ما تعاقبه بخصام أو حرمان تلاقيه بيتفنن انه يعمل اى حاجة جديدة عشان تصالحه، وممكن يمنع نفسه من تصرفات انت حابب انه يعملها ويظهرها ليك وقت ماتكون انت زعلان منه
فى شروط اساسية في توجيه سلوك الطفل قبل ما تقرر تضرب
توجيه سلوك الطفل من غير ضرب
الشرط الاول:
ان يكون عنده 9 سنين فما فوق
الشرط التانى:
انك تكون اتكلمت معاه وفهمته غلطته وعرفت السبب من ورا تصرفه واستخدمت معاه كل اساليب العقاب التربوية وصبرت عليه (زعقتله, خاصمته, طولت فى فترة الخصام, حرمته من أكتر من حاجة ,حرمته وخاصمته فى نفس الوقت) لكنه مش بيقف عن الغلط وقتها ممكن توصل الامر لمرحلة الضرب
الشرط التالت:
الضرب مايكونش مبرح يعنى بلاش الضرب بالقلم على الوش.وبلاش الضرب الجامد اللى يسيب أثر على الجسم.يكفى انك تضربه كذا مرة على ايده او دراعه او رجله وخد بالك الطفل اللى ما اضربش فى صغره أبدا تأثير الضرب عليه بيكون شديد.فالضرب ولو بسيط هيجيب نتيجة فى الحالة دى بس
