نصائح لـ عصبية الام على أولادها بسبب جوزها

لكل أم بتطلع همها وعصبيتها نتيجة خنقتها على أولادها إنتي هتطلعي أولادك مرضى نفسيين، ورداً على عصبية الام اللي بيقولوا: ماقدمناش غير العصبية علي ولادنا عشان ننفس عن ضغوط الزوج والحياة. و ما باليد حيلة! هنقدم لكم نصائح لكي تتفادي هذه المشكلة .

نصائح لـ عصبية الام على أولادها بسبب جوزها

أحب أقول لكل أم :

زي ما جوزك هو بيقدر يتكلم ويقول “شيلي انتي”. انت من حقك تردي بأدب وزوق و تعاطف “انا مقدرة انك مش بتحب تعمل كذا. وانا كمان مش قادرة.

صحياً مش قادرة و بقيت أأثر علي نفسية الولاد من كتر الضغط اللي عليا. اكيد الولاد أهم ونفسيتهم أهم. وانا متأكدة انك هتلاقي حل لموضوع ال كذا. وربنا يخليك لينا”

طيب هيكون رد فعل جوزك إيه؟!

رد فعله ممكن يكون:

١- انه يفكر ويعقلها ويتفهم ويرحم ولاده ومراته. لأنه اكيد مايرضيهوش تدمير نفسيتهم

٢- أو ممكن يتكسف من نفسه شوية ويزعق بكلمتين ويعمل مقموص شوية وخلاص. و إنتي  تتمسكي بموقفك اللي هو حقك في حياة كريمة وحق ولادك إن يبقا ليهم أم سوية نفسياً ترعاهم وتحبهم ويترحموا من عصيبة الام على أولادها بسبب جوزها.

٣- لو رد فعله إنه مصر انك تشيلي فوق طاقتك ويوصلك إنك تؤذي ولادك وتظلميهم بعصبيتك يبقا نطبق شرع الله (ان خفتم شقاق بينهما فحكماً من اهله وحكماً من اهلها). دخلو واحد او اتنين رجالة في القصة. مش العيلة كلها ولا ستات العيلة. ممكن الحكم يكون شيخ او حد فاهم في الدين مش من قرايبكم. المهم انك تكوني ايجابية وتدوري علي حل.

إحنا محاسبين علي الاطفال (يوصيكم الله في اولادكم) . (كلكم راع وكلكم مسؤل عن رعيته) و (كفي بالمرء اثما ان يضيع من يعول).

إنتي مسؤلة عن ولادك ماينفعش تظلميهم عشان مكسلة تسعي إنك تاخدي حقك او تشيلي علي قدك! دا كدا مش تدين منك ولا شطارة. انتي هتبقي تعبانة تعيسة. وهتكرهي زوجك وهتخليه متضايق وتعيس. و تتعصبي علي ولادك و تخليهم تعسا وغير أسوياء.

وفي الأخرة هتتحاسبي علي المظالم اللي ظلمتيها لأطفالك بسبب عصبية الام عليهم . بسبب ظلمك ليهم. اللي بيدمر نفسية رعيتك اللي هما اطفالك!

طيب بعد ما تعملي كل ده هيكون مقابل ايه دا كله؟

الحق احق أن يتبع. انتوا ماتعرفوش الولاد دول اللي مامتهم علي طول متعصبة بيبقوا نفسيا ازاي وصحياً و لما بيكبروا بيروحوا لدكاترة نفسيين  تعالجهم علاج نفسي لمدة طويلة جدا عشان مايبقوش مدمرين اوي كدا. وفي اللي بيدمن وفي اللي بيعمل بلاوي في امه وابوه.

في ألف بني ادم غيرك ممكن يبقا سواق. في الف بني ادم غيرك ممكن يبقا السباك. في الف حل للمشاكل غير رميها علي الزوجة. لكن للاسف مافيش لولادك غير أم واحدة بس!

إصلحي!

شيلي شلتك انت بس و ساعتها لما نفسيتك تتظبط. هتعرفي تربي وتبقي ام بجد  وهتعرفي تحبي وتحترمي زوجك وتبقي زوجة بجد! السكوت عن الحق هيبوظ الدنيا مش هيصلحها. استعيني بالله و اصلحي.