سؤال مهم: ازاي اتجنب المشاكل الزوجية ؟

ازاي اتجنب المشاكل الزوجية ، كل جواز طبعا مليان مشاكل لان ببساطه أي احتكاك قريب بين أي اتنين يسبب مشاكل ناتجه عن وجود اختلافات بين الزوجين في الطباع وطريقه التنشئة  لكن في ناس تعيش طول عمرها في مشاكل حتى ينهار الزواج . وفى اتنين شاطرين يقدروا ينقذوا جوازهم من الانهيار بالمشاكل، ازاي اتجنب المشاكل الزوجية ؟. سؤال مهم هنجاوبك عليه في سطور بسيطة.

سؤال مهم: ازاي اتجنب المشاكل الزوجية ؟

لازم يعرف الزوجين ان أي مشكلة لازم يطلعوا منها بعبره ودرس عشان ميقعوش في نفس المشكلة دي تاني ويبقى درس واتعلموه للابد.

وكلام في سرك:

اتعلمي انتي وجوزك متدوش ودانكوا لتدخلات خارجية تخرب بيتكوا وعلاقتكوا سواء من الاهل او الاصحاب. لان التدخل هيخلي علاقتكوا مهزوزه.

لكن خلي ارائكم طالعة من نفسكم وشوفوا ايه اللي يخلى بيتكوا يمشوا صح واعملوه. واعرفوا ان أي حد بيحشر نفسه وسطيكوا انتوا اللي سمحتوله بكده وتقدروا بسهولة تمنعوه.

حاجه كمان تساعدك تعيشي متهنية:

بلاش تقارني جوزك بجوز صحبتك. جابلها وعملها وفسحها. وتعكننى على جوزك وعلى نفسك. كل زوج له طريقة مختلفة في التعبير عن حبه ليكى.

كمان عشان ميتراكمش الزعل جواكوا وتنفجروا اتعلموا تتكلموا عن اللي جواكوا أول بأول ولما تعبرى عنها بلاش عصبية وعكننه وصوت عالي لكن بهدوء حتوصل الرسالة اسرع.

لان لو طرف زعق الطرف الثاني برضوا هيزعق ولكن لما يكون في طرف مضايق الثاني لازم يهدي الدنيا والا البيت هيولع من الخناقات.

كمان اعرفوا ان كل سنه بتعدي عليكوا كزوجين دي سنه يتتعلموا فيها وتاخدوا على بعض اكتر وتكتشفوا ايه اللي بيزعلكوا وايه اللي بيفرحكوا فالسنة اللي جاية هتكون احلى من اللي فاتت في جوازكوا.

لازم كمان تعرفي ان الحياة الزوجية مش من اول يوم طريق مفروش بالورد لكن رحلة تعب في البداية لحد ماتتوصلوا أزاي تسعدوا بعض وتفرحوا بعض وتخافوا على مشاعر بعض.

شاركوا احمالكوا سوا لان الحمل لما بيتقسم على انتين بيخف جدا فلو في حاجه مزعلاكي شاركيها مع جوزك يمكن المناقشة تصلكوا لقرار يكون هو حل المشكلة دي كلها.

وبلاش اللي اتربيتي عليه تطلعيه في الجواز مش عشان كنتي محرومة من الطلوع والخروج في بيت ابوكي بعد الجواز عايزة تطلعي كل يوم ومفيش أي احساس بالمسؤولية عن زوج وبيت أو اطفال.

بلاش كمان الخدعة الكبرى هي ان الجواز من اوله هنا ونعيم وسعادة لان مفهوم السعادة لا يتحقق بدون مجهود وسعي للوصول اليه. ومتعه الجواز في العطء وليس الاخذ كما تظني.

لان لو داخلة الجواز تاخدي بس مشاعر وحب واهتمام من جوزك وانتي مش بتعطي هيبقى في صراعات ومشاكل كتيرة.

بلاش كمان نبنى بينا وبين بعض حواجز ونحكم على بعض بسرعة ونثبت الصورة دي جوانا لان الوقت هيمر ومع العشرة هنفهم بعض اكتر فلازم نقضي وقت كبير في التواصل مع بعض بشكل يومي ومهما اختلفنا لا نؤى مشاعر بعض.