حلم الزواج وأهم 10 مفاهيم خاطئة عشان متتصدموش

نقدم حلم الزواج وأهم 10 مفاهيم خاطئة عشان متتصدموش، لكل عروسة مقبلة على الزواج المفاهيم العشرة الخاطئة في الزواج عشان متتصدمش ويجلها إحباط.

حلم الزواج وأهم 10 مفاهيم خاطئة عشان متتصدموش

المفاهيم العشرة الخاطئة في الزواج

1- هتخرجوا على الفجر والدنيا هادية والناس نايمة وتشوفو شروق الشمس وانتو ماسكين ايد بعض . مره لما زنيت على احمد عشان نعمل كده طلعني السطح واحنا بنتفرج ع الشروق مسك ايدي وقالي كده مسمعكيش تطلبي مني حاجه لمدة شهر

2- ان لازم تعملي نيولوك وتغيري كل شوية وبتاع . على فكره الرجاله مش بتاخد بالها من اي تغيير . المرة الوحيدة اللي احمد خد باله لما كنت جايبه روج كاشمير وموضة وبتاع وفرحانه بيه لقيته بيقولي ايه السيانوزس (cyanosis اللي في شفايفك ده).

3- ان جوزك هيعلمك السواقة ويبقي وقت رومانسي و قلوب كتيير. المره الوحيدة اللي اتحايلت ع احمد عشان يعلمني روحنا متخانقين . هوا شايف اني غبية ومش هتعلم وانا شايفه انه عصبي ومش صبور – وفيها ايه لما اخبط العربية عشان اتعلم وعلى راي المثل easy come easy go  لازم اخد وقتي عشان منساش

4- على فكره مش هتفرحي لما جوزك يدخل معاكي المطبخ ويساعدك وتعملو اكل سوا . انا احمد لما بيدخل معايا المطبخ بيربكني.

( متحطيش زيت كتير ف الاكل ، مبحبش السمنه ف الاكل ) مع انه كل مره بياكلها عادي الملح كتير . متقطعيش البصل من غير جاونتي ايه ضاه ! الاكل ليه عامل كده .انا بخليه يحلف انه ميدخلش المطبخ لغاية مااخلص الاكل

5- “اقرب طريق لقلب الراجل معدته ” بصراحه انا مش عارفه العيب في المثل ولا في اكلي ولا في معدة احمد

6- جوزك مش هيجي من بره يحضنك و وحشتني حبيبتي والكلام ده . ده هيجي غرقان عرق وشايل كياس الخضار والفاكهه و انتي يا غالبا لو جريتي عليه مش هيبقي عشان واحشك ابسلوتلي ده انتي عايزه تشوفي جابلك الطلب اللي بتطلبيه منه يوميا ليكي شهرين وبرده بينسي

7-جوزك على ماتعوديه ده بصراحه افشل نصيحه ف الجواز يعني مثلا كل يوم اقول لاحمد خد الزبالة معاك وانت نازل ولو نسيت اقوله ف مره مش هيفتكر ياخدها او مثلا كل مره وهوا مروح اقوله هاتلي حاجه حلوه وانت جاي ومبيفتكرش ده تقريبا اتعود انه ينسي يجيب.

8- الزن على الودان امر من السحر دي بردو نصيحه فاشلة تانية يعني مثلا لمبة المطبخ لما اتحرقت وقولت لاحمد قالي بكره. بعد اسبوع يااحمد لمبة المطبخ محروقة قالي خلاص بكره ان شاء الله. بعد شهر احمد قولي بصراحه انتي مزنوق في تمن اللمبة ؟ احنا مش غرب دلوقتي انت ممكن تصارحني عادي

9- لغاية ما ف يوم في قعدة صفا كده اتكلمنا ف الموضوع ده واتناقشنا ف اهمية لمبة المطبخ ووعدني ان بكره هيغيرها واديني مستنية