طرق التخلص من العصبية الزائدة علي نفسك وبيتك

هل ملاحظة إنك عصبية الأيام دي؟ مش مستحملة كلمة من أي حد؟ على طول بتزعقي لأولادك؟ بتعملي مشاكل مع جوزك؟ يبقى إنتي محتاجة هدنة شوية، لإنك مضغوطة. وإليكي المزيد من النصائح و طرق التخلص من العصبية الزائدة على نفسك وبيتك وأولادك في هذا المقال.

طرق التخلص من العصبية الزائدة علي نفسك وبيتك

ملاحظة إنك عصبية على نفسك وجوزك وعيالك؟ إليكي هذا التفسير وطرق التخلص من العصبية:

أولاً: الدافع الداخلي

ادركي إنك وصلتي لوضع صعب، ونفسيتك محتاجة تتغير. اسعي إنك ترجعي تقربي من ربنا أكتر. بعدك عن ربنا هو اللي بيدي الشيطان فرصة يسيطر على أفكارك ويؤثر على حياتك، ويخلي نفسيتك في الأرض. فأكثري من الصلاة، الأذكار، الاستغفار، واستعيني بالله قبل أي أمر ليمنحك القوة ويعينك.

ثانياً: نظرتك لحياتك الزوجية

لو في مشكلة مع جوزك، بتكون هي السبب الرئيسي لعصبيتك في يومك كله، حتى مع نفسك ومع أولادك. فننصحك إنك تبدأي تصرفي غضبك أول بأول، واقعدي احكي مع جوزك. احكي إيه اللي مضايقك، واتناقشوا، لكن ما تخلوش النقاش يقلب بمشكلة.

لكن لو وقعتوا، يبقى نحل مش نعقد. اسمعوا وجهات نظر بعض، وانهوا حواركم وإنتوا الإتنين مرتاحين، وبادئين بداية جديدة مع بعض. وتعلمي أول ما يكون في حاجة مضايقاكي، اختاري “أقرب وقت مناسب” عشان تقعدي تحكي مع جوزك عن اللي بيضايقك.

ثالثاً: بصي على نفسك

إجهادك في البيت مع جوزك، أولادك، البيت، الشغل… هيحسسك إنك مظلومة، ومقهورة، ومضغوطة. ولهذا ننصحك تعيدي تخصيص وقت لنفسك في اليوم، حتى لو نصف ساعة، تعملي فيهم أي حاجة تحبيها وتنشطي بيها طاقتك وتسترخي، زي:

• الذهاب للكوافير

• الخروج مع أصدقائك

• ممارسة هواية محببة: كروشيه، تريكو، رسم، عزف، قراءة كتاب أو مجلة

• العناية بجسمك

رابعاً: صاحبي أولادك

أكتر حاجة هتنزل من عليكي عبء التربية، هو إنك تصاحبي أولادك. فبناء علاقة قوية مع الأطفال يفتح قنوات الاستقبال بينكم. فكوني قريبة منهم، وكوني صديقتهم، والعبوا واضحكوا مع بعض.