نصائح للزوجة في معاملة زوجها – عِفي زوجك

نصائح للزوجة في معاملة زوجها،  عِفى زوجك لان عفة الزوج مش معاشرة وبس، كل راجل احتياجاته مختلفة عن التاني، اساس الزواج انك تعفي زوجك. وظيفتك من يوم ما اتجوزتي هي: زوجك.  انتي كزوجة مطلوب انك تعفي زوجك بحسابات زوجك، بحساباته هو، وليس بحساباتك انتي!

نصائح للزوجة في معاملة زوجها –  عِفى زوجك

• لو زوجك يتعف بالمعاشرة.. عفيه بالمعاشرة
• لو زوجك يتعف بالمغازلة.. عفيه بالمغازلة
• لو زوجك يتعف بالأكل، نوعيله في اكله
• لو زوجك يتعف بالنضافة، خلي بيتك على سنجة عشرة
• لو زوجك يتعف بالاولاد.. عفيه بالاولاد
• لو زوجك يتعف بالمنظر؛ لبس و صبغة وكوافير وجيم، عفيه بده.
• لو زوجك يتعف بانه عايز حد يتكلم معاه، اتكلمي معاه بعيد عن الواد والبت والطبيخ، فضي نفسك ليه
• واتكلمي معاه بدل ما يدور على اللي تتمنى تفضاله.
• لو زوجك رومانسي كوني رومانسيه، عملي خليكي عملية، اجتماعي خليكي اجتماعية.

هتقوليلي ودوره هو ايه؟! ، هقول ليه دور والف دور كمان، بس احنا في بلد بتفرم الرجاله، ماتكونيش مفرمة معاهم، دي نقطة.

النقطة التانية؛ كل ست تقدر تخلي جوزها يجي زي الحمل الوديع يشرب من ايدها لدفة في ايدك انتي.

دايما تلاقي واحده تشتكي من انها عامله لزوجها كل حاجه ومش عاجبه، لا هو مش مش عاجبه، هو حساباته غيرك.

انتي منضفاله البيت على الاخر ومذاكره لعياله وبتزوري اهله وبتطبخيله مشمر ومحمر، وبتدخلي مهدودة تنامي وكل ده مش عاجبه  فتيجي تستغربي وتحكي، والناس تستغرب فوق استغرابك، ويا سلام لو تقفشيه بيكلم واحده بليل على النت.

اه ده انت بقى مش طامر فيك! ومش هيطمر فيه لانه مش عايز ده.

هو اصلا مش عايز كل ده يكون على حسابه، هو عايز يجي يلاقيكي صاحيه تحكي معاه شوية، حتى لو قصرتي في الباقي.هو عايز كده غيره عايز يجي يلاقي العيال مصحصحين وقاعدينله، غيره عايز يرجع يلاقي شموع وورود، غيره عايز يرجع يلاقيكي على سنجة عشرة. المهم هو عايز ايه، مش انتي فاضية لايه!

ابنتى:

انتي مش متجوزة عشان خاطر يتعملك فرح وتلبسي ابيض ويبقى ليكي بيت لوحدك، وتجيبي نونو، وتتجهزي وتكتبي كام بوست، انتي متجوزة عشان ليكي وظيفة، لو مش فاهمه يعني ايه زواج يبقى متتجوزيش، ولو انتي متجوزة بالفعل دلوقتي تاني هقولك وظيفتك زوجك، وبتؤجري على ده.

وهتتسألي عن ده، عن عفة زوجك، لانك انتي مسؤلة عنها، واعرفي انك لما بتعفي زوجك، بتعفي مجتمع بحاله، لان ساعتها جوزك مش هيبقى زي المسوخ اللي في الشارع دول.

تاني بقولك:

عفي زوجك بحساباته هو، لا بحساباتك، ولا بحسابات اهلك.. ومتروحيش تشتكي لصحبتك ، لان صحبتك بتعف زوجها بحسابات زوجها، واللي هي مختلفه عن حسابات زوجك، فمش هتفيدك بحاجه

ولما تيجي تعفيه وبحساباته هو وتلاقيه مش واخد باله تبقي عبيطة لو فاكرة كده، لما واحده تقول انا الحمد لله علاقتي بزوجي كويسه ، بس انا بعمله كل حاجه وهو لا بيعلق ولا شايف حاجه، وعمره ما قالي ده حلو ولا ده وحش عبيطة انك تفكري كده ، وغبيه انك تفكري تاخدي راي حد عن ده، مين قالك ان جوزك مش حاسس ولا شايف، لا حاسس وشايف كمان، وواخد باله لحد الشبع.

وهديكي مثال

انتي عمرك دخلتي بيت حد واستغربتي ان فيه مية عندهم! عمرك دخلتي بيت حد واستغربتي ان عندهم كهربا! مابتستغربيش، لان الحاجات دي انتي الفتيها، يعني اتعودتي على وجودها، عمرك قولتي الحمد لله عندي ميه، ولا عندي كهربا!! عمرك روحتي حكيتي عن الماية والكهربا اللي عندك لحد اصلا!! بس تعالي كده لما تنقص الحاجة دي من بيتك! هتعملي ايه؟ كارثه . ولازم بديل فوري

اهو جوزك كده تمام، انتي وانتي في بيتك وانتي بتعملي لجوزك كل حاجه، هو اتعود عليها، حتى لو معلقش لو مشي في الشارع لقى واحده بتتمرقع مش هتلفت نظرة، ما مراتي بتتمرقع في البيت، لو لقى واحده صابغة شعرها ولا متعطرة ولا لابسة قصير، مش هتلفت نظره، لانه شبعان من ده في البيت، زي ما انتي لما ملفتش نظرك لوجود مية في بيت دخلتيه. لانها عندك، هو مش هيلفت نظره واحده لانك مكفياه وعفتيه ومشبعاه.

انتي كده عملتي اللي عليكي معاه وتمام، وعلامات ان ده تمام، انك تلاقيه مابيبصش بره ، هو عامل زي واحد شبعان، قاعديه على سفرة، مش هياكل، لانك انتي مشبعاه، قاعديه على النت عشر سنين، مش هيبص لحد، لانه شبعان، حتى لو مقالش، بس هو شبعان.

خلاصة القول

ماتحكيش لحد على مشاكلك، الحسابات مختلفة من بيت لبيت وممكن يتهد بيتك مش يتعمر وهما مايقصدوش ماتحكيش لانك كمان وممكن وانتي بتحكي تتصابي بعين في حاجه بتعمليها وغيرك مش عارفه تعملها وانتي كاخت لما تسمعي مشكلة واحده ماتقعديش تتريقي عليها وتسخنيها على جوزها، هو حر ، لو مش هيطلب من زوجته هيطلب من مين!

احنا في فتنة.. سواء الاختلاط على مواقع التواصل الاجتماعي .. او في ان كون المراة المطلقة سوقها ماشي ، فبقت اي اخت تستهل انها تتطلق، وتتطلق وهي حاسه انه ظالمها وان ربنا هيخسف بيه الارض لانها عملتله كل حاجه ومش عاجبه

وفي الواقع انه كمان مظلوم، لانك عملتي وضيعتي مجهودك ووقتك في حاجه هو مش عايزها، كانك طبختي اكل هو مابيحبوش، مش هياكله، وممكن ينزل ياكل في الشارع، ازاي يتلام على كده!

يا ابنتى حافظي على بيتك، والله الطلاق ده حاجه بشعه و90% من اللي عملوه ندموا، وان لم يعترفوا بذلكيا ابنتى انتي لو قعدتي اتكلمتي مع زوجك وفهمتوا بعض 80% من مشاكلكم هتتحل، لا دي مش هتحصل من اصلهيا ابنتى القاعدة مع زوجك دي لازم تعمليها على فترات لان كل فترة ليها طلباتها وممكن احتياجاته تختلف من فترة لتانية

يا ابنتى ماتقعديش تتكلمي مع صحبتك، اقعدي اتكلمي مع جوزك، اتكلمي مع جوزك، اتكلمي مع جوزك وشوفيه هو عايز ايه، واعمليه ، هو اللي عنده الحل مش صاحبتك.الموضوع مش سهل، ومهمة شاقه عليكي إلا لِما كان اجرك الجنة لو زوجك رضى عنك، لان رضاه مرهق ليكي،، بس الجنة تستاهل وهو كمان يستاهل..

يا ابنتى حافظي على زوجك، لانك هتتقهري لما تلاقي غيرك حافظت عليه.حافظي عليه ، وعفيه، بحساباته هو وهذه النصائح للزوج أيضاً عليه ان يقدر زوجته ويعفها ويحتويها ويشاركها في أعباء البيت والحياة

واسأل الله ان ينزل سكينته