قصة تعليم الطفل الفرق بين البيبسي والحليب وفوائد الحليب و اضرار البيبسي وتعلمهم ازاى يختاروا الافضل لصحتهم احكيها لاولادك بدل اقناعهم الامتناع عن البيبيسى هما هيمنعوه
قصة تعليم الطفل الفرق بين البيبسي والحليب
– كان ياما كان ما يحلى الكلام الا بذكر النبى عليه الصلاة والسلام
( وعلميهم يرددوا وراكى عليه الصلاة والسلام )
كان مرة فى اتنين واحد اسمه بيبسى وواحد اسمه حليب كانوا واقفين جنب بعض فى رف المشروبات بالسوبر ماركت حصل حوار بينهم
الحليب : سأل البيبسى وقاله انت مين
البيبسى : انا البيبيسى اللى الاطفال بيحبونى كلهم
الحليب : بس انا الاطفال مش بيحبونى زيك يا بيبسى ليه ؟
البيبسى : بيحبوني انا اكتر ولما بيدخلوا السوبر ماركت بيشتروني انا ومابيحبوش يشتروك
الحليب : بس انا مليان فيتامينات وكالسيوم مفيد لصحتهم
البيبسى : بيضحك على الحليب وقاله بس انا معنديش فيتامينات ولا كالسيوم زيك والاطفال بيحبونى اكثر منك
الحليب: انت مليان حاجات وحشه بتكسر العضم وتبوس الاسنان وانا ببنى عظامهم واسنانهم
البيبسى : ههههه والاطفال مش عارفين كده وبيشترونى انا بردوا
الحليب : بس مامتهم بتتحايل عليهم عشان يشربونى وهما مش بيرضوا
قصة تعليم الطفل
البيبسى : ههههه عشان انا طعمى احلى منك مع انى مش مفيد زيك وبوجع بطنهم وببوظ صحتهم
و لما بكون ساقع اوى بخلى زورهم يوجعهم
الحليب : وانا ببنى عضلاتهم وبخلى الطفل قوى ويقدر يجرى ويلعب و يعمل حاجات كتير وبخلى صحتهم احسن لما بيشربونى وبقوى مناعتهم
وكمان بخليهم يناموا كويس بليل وبيحلموا احلام سعيدة ومامتهم بتعملهم منى حاجات حلوة كتير زى ميكس الفواكه
او عصير الفواكه بالحليب وكمان مامتهم بتعملهم منى المهلبية و الارز بلبن وكمان بيتصنع منى الزبادي المفيد والجبنة شايف انا مفيد ازاى
. وهما بيتكلموا ويتخانقوا كان في ولد صغير واقف سامع الكلام اللي هما قالوه كان بيفكر يشتري البيبسي ولا الحليب .
فكر شويه وقال لنفسه : لو اشتريت البيبسي المضر دا هيخليني ضعيف وتعبان ومش هقدر العب بالكوره مع اصحابي في النادي ولو اشتريت الحليب الحلو دا هيخلي عضمي قوي واكبر بسرعه وسناني زي الحديد واقدر العب مع اصحابي واغلب الفريق التاني .
انا هشتري الحليب ومش هشتري بيبسي تاني ابدا وفعلا راح الولد خد علبة الحليب من على الرف وساب البيبسي المضر لوحده بيعيط عشان ماعرفش يأذي الولد الصغير
واشتراه وروح البيت شربه مع البسكويت
وتوتة توتة خلصت الحدوتة حلوة ولا ملتوتة
