كلنا بنحب الشاورما خاصه لما نكون بنتمشى وريحتها كدا تطلع من محلات الشاورما نبقى نفسنا ناكل حتى 5 سندويتشات .طب ايه رايكم نعمل شاورما السي فود احلى من شاورما الفراخ و شاورما اللحمه وسعراتها الحرارية اقل من العادية ونعملها بالسى فود .
شاورما السي فود بطريقة شهية لعملها
المقادير لكميه تكفى 6 اشخاص:
- ربع كيلو سمك فيليه
- ربع كيلو جمبرى مقشر ومنظف من كيس الرمل
- ربع كيلو كاليمارى
- بصله حمره مقطعه شرائح
- بشر ليمونه خضرة.
- عصير ليمونه
- ملعقة خل
- ملعقة زيت زيتون
- ملعقة ثوم مفروم.
- ملعقة كسبره خضرا
- ملعقة بقدونس
- ملعقة كمون
- ملعقة كسبره ناشفه
- ملعقة ملح
- خبز تورتيلا
- شرائح فلفل الوان وطماطم
الطريقة:
1- قومي بتقطيع السى فود كلها شرائح طويله وتبليهم ببشر الليمونه وعصير الليمون واخلطيهم مع البصل الاحمر شرائح وادعكيهم مع بعض وسبيهم في الثلاجة على الاقل نص ساعه عشان تتبل والليمون يمص ريحتهم.
2- في الخلاط حطى الخل وزيت الزيتون والثوم والكسبره الخضرا و البقدونس والكمون والكسبره الناشفه والملح واضربيهم كويس في الخلاط
3-على الجريل او طاسه سخنيها خالص وحطى عليها السمك المتبل والخلطه اللي عملتيها في الخلاط واقعدى قلبي فيهم لحد ما يتشوا كويس وكل السى فود يستوى .
4-في طاسه تانى حطى معلقه زيت وشوحى الفلفل الالوان مع الطماطم .
5- هاتي عيش التورتيلا وحطى السى فود مع شرائح البصل والطماطم ولفيها وقدميها مع كاتشب و مايونيز وبألف هنا .
