طريقة عمل البفتيك بحشوة جديدة بالخطوات مصورة

بتحبى تعملى بفتيك بس زهقتى من الطريقة العادية اعملى احلى بفتيك بحشوة و طريقة عمل البفتيك جديدة رووعة بالخطوات مصورة

طريقة عمل البفتيك بالخطوات مصورة

المقادير:

• نصف كيلو لحمة شرائح او بفتيك
• كوب ماء بصل
• ملعقة صغيرة خل
• ملعقة كبيرة كاتشب
• ملح
• فلفل اسود
• ملعقة بهارات لحمة

الحشوة:

• جبنة رومي
• زيتون مخلى
• فلفل اخضر رومى الوان مقطع شرائح طولية

للتغليف:

• بقسماط
• دقيق + ملعقتين نشا عشان يقرمش من بره
• زيت للقلى

الطريقة:

ده بيكون حجم الشريحة لما تشترى اللحمة لازم ترق باى شاكوش لحم او مدق او هون او ملعقة خشب عشان تنضج اسرع

بندق الشرائح وده شكلها بعد ما رقت كبر الحجم

التتبيلة بتكون ملعقة كبيرة كاتشب كفاية بنضيف عليه ماء بصل بنبشر بالمبشرة 3 بصلات كبار او اربع بصلات عشان نحصل على ماء بصل كتير بنحط البصل المبشور فى مصفاة وتحته طبق عميق و نرش رشة خفيفة ملح على البصل ونسيبه 10 دقائق ثم نعصره بايدينا هينزل فى الطبق ماء بصل كتير تفل البصلbممكن نتبل بيه لحمة مفرومة وتعملى احلى كفتة

خلطنا ماء البصل و الكاتشب وضيفنا عليهم ملعقة صغيرة خل وفلفل وبهارات وبلاش الملح دلوقت عشان بيأخر السوى هنخلى الملح وقت التسوية خلطنا مكونات التتبيلة

بنضيف اللحمة التى تم رقها بالمدق او الملعقة ونتركها فى التتبيلة على الاقل 4 ساعات انا سيبتها ليلة كاملة عشان تستوى اسرع

بعد ما تركناها بالتتبيلة نبدأ نحشيها وطبعا مش هنرمى ماء التتبيلة لاننا هنتبل بيها اللحمة قبل البقسماط بدل البيض المخفوق

نضع على حرف الشريحة شرائح رفيعة فلفل وجبنة رومى وزيتون و نلفها رول

نضغط عليها بايدينا هتمسك ونحشى باقى الكمية

التغليف:

هنغلف الرول فى الدقيق كويس

ونبله فى تتبيلة اللحمة اللى اتبلت فيها قبل كده

وده شكل الرول بعد ما اتبل بالدقيق ثم ماء التتبيله هنغلفه كويس بالبقسماط ونضغط عليه برفق

ترص كمية البفتيك اللى اتبل بالبقسماط فى طبق ساعة قبل القلى لتتماسك وتوضع بالفريزر دى خطوة مهمة عشان البقسماط ما يفك من اللحمة

يسخن زيت فى مقلاة ونضع به اللحم او دقيقة على نار عاليه ثم نهدىء النار الى متوسطة حتى ينضج وتقلب برفق لحد ما تاخد لون جميل

نطلعها على مناديل ورق وتقدم

ممكن نستبدل البقسماط والدقيق باننا نشويها بصينية بالفرن على نار هادئة ومغطى بورق الومنيوم ولما تنضج بنكشف الغطاء لتأخذ لون والف هنا