إزيكم عاملين إيه: النهارده بمناسبة الشتاء اللي مرتبط بـ فاكهة البرتقال هنقدم البرتقالة الفنية ، تعالوا نتعلم أفكار جديدة لتزيين سفرتنا بأبسط تكلفة.
البرتقالة الفنية : أفكار من البرتقال بالصور
أول صورة فكرة طريفة لتقديم الحلويات للأطفال.
هنقطع البرتقالة حوالي الربع والتلات أرباع.
هنفرغها ببولة الآيس كريم وهنفتح فيها فتحات بالمنظر اللي واضح في الصورة دي بالسكينة.
الصورة التانية لقشر البرتقال.
هنقشر البرتقالة بطريقة متواصلة ونبتدي نلف القشرة الطويلة بطريقة تشبه شكل الوردة. ممكن نوزع الوردات دي على سطح سفرتنا بطريقة عشوائية بين أصناف الأكل أو نغرزها في أعواد الشيش طاووق بأشكال مختلفة مع أنواع تانية من الفاكهة.
الصورة التالتة
هنقسم البرتقالة أكتر من النص بشوية ونفرغها برضه ببولة الآيس كريم، وبالقطاعات المختلفة نضيف لمستنا الفنية، وممكن حوالين كل شكل نبروز القلب أو النجمة بأعواد القرنفل بحيث لما نحط الشمعة في الداخل تدينا منظر جمالي وكمان ريحة حلوة عن طريق القرنفل.
الصورة الرابعة
سهلة وبسيطة وجديدة، هنغرز شاليموه في كل برتقالة ونزينها بأي نوع من الزهور المحببة إليكِ، بس يستحسن تكون زهرة بسيطة ومش كبيرة.
صور لأفكار:
أتمنى تكون الأفكار أعجبتكم، وكل موسم وأنتم طيبون.
