احترام الطفل – انا كبرت ولازم تحترموني هكذا كانت صرخه طفل
احترام الطفل
كما نشكى من أطفالنا،أطفالنا تشكى منا إليكم هذا النموذج المحزن جدا ،وهو عبارة عن صرخه طفل ” انا كبرت ولازم تحترمونى ” يجب علينا احترام الطفل .
احترام الطفل
“انا كبرت ولازم تحترموني ” هكذا كانت صرخه طفل
احب اعرفكم عن نفسي
انا اسمي احمد ” بس ده اسمي برا البيت ”
لكن جوة البيت انا ليا اسماء تانية كتير عارفين اسمى اية ؟
اسمى الغبي اسمي المستفز اسمي الفاشل اسمي الشقي
اسمي المهمل ” يعني كل اسم حسب موقفه ”
احب اقولكم سر
انا بحب اقعد مع اصحابي جدا ايوا اكتر من قعدة البيت عارفين ليه ؟
لان البيت يعني بابا يعني التهزيء يعني الزعيق يعني محاضرات ومواعظ طول اليوم
لان البيت يعني ماما يعني تهددني وتقولي ” هقول لبابا” يعني اعمل ولا تعمل يعني نقد واوامر طول اليوم
احب اقولكم سر كمان
ان بحب احكي مع اصحاب اكتر عارفين ليه ؟
لانهم بيفهموني بيحاوروني في هدوء لكن بابا وماما لا طبعا ” الهدوء دي كلمة مش في قاموسهم ” مفيش حاجه بترضيهم او تعجبهم فيا
احترام الطفل
طب احب اسالكم سؤال : هو انا كبير ولا صغير لانهم حيروني ؟
مع اني بكبر في السن لكن هما علطول شايفيني طفل صغير ممنوع اقول رأيي لازم الزم حدودي في اي حاجة ” طب ايه هي الحدود؟ انا معرفش بس لازم الزمها ”
لكن احضر لهم طلبات لان انا الكبير اخلي بالي من اخواتي لان انا الكبير لا ابكي لاني راجل وكبير . طيب ازاي مرة كبير ومرة صغير ؟ ياريت تفهموني
اقولكم الخلاصة بصراحة
انا بديت اكره بابا وماما لاني متضايق منهم جدا متغاظ ومخنوق من معاملتهم ليا وعايز اقولهم
أنا كبــرت ولازم تحتـرموني
وانا بعيد عنكم بضحك وبتبسط لان معاكم مبسمعش اي كلمه تشجيع اي كلمه حلوة ولا حتى بتشوفوا فيا اي حاجه حلوة
وتقلولي ” احنا ببنصحك عشان عايزينك احسن واحد في الدنيا”
الناس بتتقدم بالكلام الحلو الناس ببتقدم بالتشجيع الناس بتطلع السلم خطوة خطوة مش مرة واحدة الناس ببتقدم بالتجربة والخطأ
ارجوكم افهموني ارجوكم احترموني ارجوكم اتعلموا ازاي تعاملوني
