خلى بالك لو فاكره ان الصوت العالي علي العيال هيخوف العيال ويخليهم يعملوا ليكوا الف حساب تبقى غلطانه لان مع الوقت هيفقد تأثيره وهيبقى سامع الصوت العالي والشخط ولا فارق معاه وانتى اللى بتنبحى صوتك على الفاضى ولو ضربيته شويه وجسمه بالبلدى كده هينحس وهيديكلا بعد كده الشبشب وهو مبسوط ويقولك عادى اضربينى اصلى اتعودت طب ايه الحل؟ تعالى واقرى المقال ده.
بلاش الصوت العالي علي العيال
لو الصوت العالى والشخط مش جايب نتيجه , ولو ضربنا برضوا مش جايب نتيجه . طب ايه اللى ينفع بقى ؟
انتى محتاجه طريقه جديده للتعامل معاه والطريقه دى هى انك تبصى على ابنك من زاويه تانيه وبطريقه مختلفه .
وشوفى نص الكبايه الميان مش علطول النص الفاضى هو اللى مركزه فيه وشايفه ان ابنك مبيعملش غير الغلطات وبس .
البسى نظاره بيضا وشوفى بيها الامور وكفايه النظاره السوده اللى بتخلينا نبص على اولادنا كانهم عفاريت ويجننوا بلد .
تدريب للتخلص من الصوت العالي علي العيال :
لمده اسبوع متواصل سجلى الامور الكويسه اللى بيعملها طفلك وشوفى انك بديتى تحترميه وتشوفيه انه حد تانى خالص وتتبسطى في التعامل معاه .
– والكلام للاباء برضوا فمش معنى انك ابوه انك تتحكم فيه وتهزأه قدام اصحابك والناس وتشخط فيه
وتقوله : انت مش فالح في اى حاجه. ولا تمد ايدك عليه قدام الناس وتخلى صورته زفت .
الاب والام هما اكتر ناس لازم يحترموا شخصيه الطفل عشان يعلموه مبدأ ” الاحترام ” للذات وللاخرين لانك لو مش بتحترمه هو مش هيحترم اى حد لأنه مفهمش يعنى ايه احترام من الاصل .
انتوا كمان لازم تكونوا من اول الناس اللى تدافع عنه ضد اى حد يهينه او يغلط فيه مش تضحكوا على التريقه وكلمات السخريه الموجهه له على سبيل المرح .
تبديلات ستغير طريقه تعاملك مع طفلك والصوت العالي علي العيال :
لو انت بتشخط فيه عشان يبطل عيط اتصدعت منه . اجرى عليه واحضنه وبوسه هتلاقيه سكت علطول.
لو انت بتشخط فيه عشان يمشى بسرعه وتلحق ميعادك جرب تقوله ايه رايك نعمل سبق ونشوف مين يوصل الاول .
لو بتشخط فيه عشان يتفوق في الدراسه شجعه وقوله لو جاب درجه حلوة الامتحان الجاى هتجبله عجله جميله يتفسح بيها .
– خلى بالك الاهانه والكلام السلبى من الاهل مثل طعن السيف للطفل اكثر من اى حد غريب تعرف كده ؟
– خلى بالك كتر الشخط والصوت العالى هيعمل توتر في علاقتك بطفلك لأنه هيفهم كده انك بطلت تحبه .
بلاش الصوت العالي علي العيال لأنه مش هيجيب نتيجة وإليكى الحل
– خلى بالك علميا لما بتشخط في طفلك هوبيتوتر ويقلق وجسمه يفرز هرمون الكورتيزون وده يقلل قدره الطفل على التركيز والاستيعاب .
– خلى بالك لما بتشخطى في ابنك ويرجع يكرر الغلط مره واتين وعشره وانتى تفكرى انه بيعند معاكى لا. هو مش فاهم بيعمل ايه غلط فلما يسيئ طفلك التصرف اولا فهميه ايه اللى عمله غلط وايه الصح اللى مفروض يعمله وبعدين ابقى حاسبيه.
– خلى بالك لما بتشخطى للطفل وتقوليله انت اللى خليتنى اتعصب واضربك انتى بتعلمى طفلك ان يحمل المسئولية الى قدامه مسئوليه غضبه عليه او ضربه له وده اكبر غلط
