بمناسبة موسم الامتحانات نقدم نصائح للمذاكرة لكل أم إبنها تاعبها في المذاكرة حيث إن المذاكرة من الأشياء التي لا مفر منها، وتحاول كل أم أن تبذل ما في جهدها لكي تساعد أطفالها على المذاكرة, وأحيانا لمجرد أن تقنعهم بالمذاكرة
نصائح للمذاكرة لكل أم إبنها تاعبها في المذاكرة
إنتى ايه مشكلتك مع أولادك ؟
ردت .
أولادى أطفال .
مشكلتى الاساسية المدرسة ؟
بجد منهدة المذاكرة و حل الواجب و مشاكل الاصحاب فى المدرسة و كل يوم شكوة من المدرسة ان ابنى بيدخل فى نوبات غضب او مش بيشتغل فى الفصل أو مش فاهم ؟ و الواجب و المذكرة و ابنى مش بيقعد يذاكر
أول حاجة حطى نفسك مكانه.
راجعة من الشغل و المدير عمال يزعق و صاحية من بدرى جدا و اول ما تدخلى البيت جوزك يقولك يلا يا هانم اعملى الواجب بتاعك ؟
هتشعرى بإيه؟
بالحب ؟ بالضيق؟
طيب هتعملى ايه؟
علطول هتعملى الواجب و لا هتعندى ؟
الأول هى ايه أولويات الأطفال و أهم حاجة فى حياتهم ؟
أهم حاجة هى طبعا اللعب ثم اللعب ثم اللعب و المذاكرة أصلا مش فى الأولويات
نصائح للمذاكرة لكل أم إبنها تاعبها في المذاكرة
طيب ماهو لازم يشتغل و يذاكر؟
أكيد طبعا بس الأول تهيأى له المكان المناسب للمذاكرة و الادوات المناسبة من الاقلام و الكراريس و طبعا الاكل الصحي و الوقت المناسب مش علطول يلا بسرعة خلص الأكل .
يلا بسرعة خلص المذاكرة علشان التمرين ؟ يلا يلا يلا يلا
نصائح للمذاكرة مع الطفل
جربى كدة مرة تلعبى مع ابنك عشر دقايق قبل المذاكرة و بعدين قولى له هنكمل أول ما تخلص الواجب ؟
أكيد هيكون اريح من الزعيق و المنهدة و الكلام و الغضب
جربي مرة كدة انك تعملى الواجب و المذاكرة لعبة او مسابقة
مثلا هتحل الواجب وانا هغسل المواعين ؟ اللى هيكسب هيحدد نلعب ايه بعد الواجب او اعملى له المذاكرة أغنية او لعبة مسلية له زى مثلا فى الحساب معاك عشرة جنيه و رحت اشتريت عصير ب 3 جنية ؟ الباقى كام ؟ و فعلا اعملى انك السوبر ماركت و هو يجى يشترى منك و يديك الفلوس و اكتبى له أيصال بالعصير و اسأليه كدة الباقى كام ؟
أو ممكن تجربى الساعة .
بالمنبة مثلا يذاكر عشر دقايق و يلعب خمس دقايق طبعا هو يظبط المنبة و يسابق الوقت تقبلى أن فى أطفال حركتها كتير .
الطفل الحركي خليه يربط المذاكرة بحركة مثلا جدول الضرب ينط لكل رقم
ممكن تعملوا رسم للمذاكرة مثلا لو جدول ضرب .الوردة لها اربع ورقات و عندنا خمس وردات . و ارسميها لهو كدة لما نضربهم يكون كام ورقة؟
دة لو طفل صغير طيب الكبير أعمل معاه ايه ؟
اتفق معاه و هو يحدد الوقت المناسب للمذاكرة و وافقى و تابعيه من بعيد بدون لوم و لا عتاب و اتفقى معاه على طريقة للمذاكرة و سيبيه واحدة واحدة و خطوة خطوة يتعلم
الانسان بيتعلم من التجارب و لو مثلا لعب و ما ذكرش و درجته كانت مش كويسة .
هو من جواه هيكون عايز يحسن الدرجة سيبيه يجرب دلوقتى أحسن ما فى الوقت المهم للامتحانات يسيب المذاكرة
كمان تقبلى ان فى أطفال بطبعهم صعب يحفظ من غير فهم فبالتالى مش بيستمر فى المدرسة و المناهج المعتمدة على الحفظ
و تقبلى ان المشكلة ممكن ما تكونش عند ابنك أصلا و تكون المشكلة من المدرسة زى المعلمة مش شاطرة او مهملة أو عايزة الفصل بتاعها أحسن فصل فبتضغط على الأطفال كتير و بالتالى الأطفال يعندوا و ما يذاكروش
التشجيع مهم جداً
دايما شجعى ابنك و شجعى التصرفات الكويسة مثلا انا واثقة انك هتحل الواجب فى عشرين دقيقة ؟
و لما يحل الواجب .شجعى بجمل زى دى مثلا
انت بذلت مجهود حلو اوى فى الواجب انهاردة . لازم تكون فخور بنفسك؟
انا مؤمنة انك هتلاقى حل لمشكلة الواجب؟
بحبك بجد و علشان بحبك نفسى تجيب احسن الدرجات و مستقبلك يكون كويس ان شاء الله
طبعا الافضل تعملى روتين و اتفاق للمذاكرة وللى يحطه هو الطفل و نجرب الروتين دة لفترة محددة و بعدها نقيم هل هنكمل بنفس الروتين و لا هنغير حاجة ؟
طبعا لو تناقشوا مشكلة الواجب فى اجتماع العائلة .أكيد هتلاقوا حلول كتيرة جدا و مختلفة
إجتماع العائلة . هو طريقة من طرق التربية الإيجابية له خطوات و بروتكول و من أفضل الطرق لحل المشاكل مع الأطفال
و اخيرا افتكرى لو حل الواجب معركة كل يوم بتخضيها على المدى الطويل هيكون ابنك من نفسه عايز يذاكر و لا ايه؟
كمان لو حصل لاقدر الله ظرف طارئ ليكى و ما قدرتيش تذاكرى مع ابنك هيحصل له اية؟
علمى أولادك الخطوات خطوة صغيرة خطوة صغيرة و سيبيهم يجربوا و شجعى المجهود مش النتيجة و اعرفى ان نظام التعليم مش بيفرق ما بين النملة و النحلة فى الامتحان ؟
كل طفل له ميزة و هدف .علميه يواجه الحياة بمهارات مش بمذاكرة و حفظ و دة مش معناه يسيب المدرسة بالعكس علمية ازى يذاكر و ازى يلاقى المعلمة الصح و ازى ينجح لوحده بدون الاعتماد على اى شخص
سيبية يقع علشان يتعلم و بس كونى جنبه بالحب و التفاهم مش باللوم و العتاب و المحاضرات و العقاب
ملحوظة أخيرة
كل يوم عندى انا شخصيا تحدى جديد فى المدرسة و المذاكرة . بس الصبر ثم الصبر و بصى للمدى البعيد مش بس الإملاء بتاعة يوم الأحد بصى على الهدف لما ابنك يكون فى كلية هندسة او طب و انتى بتذاكرى له.
طيب هيعمل الدكتوراة و انتى بتذاكرى معاه ؟
بالعكس علميه ازى يلاقى المعلومة .ازى يربطها بالحياة .ازى يحب العلم و يفهمه و يتعلمه و يعلمه للأخرين
ازى يدعى اللهم ارزقنا العلم النافع ؟ ازى فعلا يكون علمه صدقة جارية له و ليكى
اللهم ارزقنا العلم النافع والعمل الصالح وارزقنا الإخلاص فيهما
