ياترى ماهي صورة الاب والام عند الاطفال في البيت؟

ماهي صورة الاب والام عند الاطفال فكرت لحظه هل يرى الابناء صورة مثاليه عن الاب والام ؟ ام تصرفاتكم ادت الى تشوه تلك الصورة في ذهن الطفل والتي ستؤثر عليه وعلى اختياراته في المستقبل؟ وفى هذا المقال سنشرح اهميه ان يترك الاب والام صورة رائعة عنهم داخل ذاكره اطفالهم.

ماهي صورة الاب والام عند الاطفال

عارف لما تقول: يلا يا ولد روح صحى ماما عشان تعملى كبايه قهوة. هو بيفكر عنك ايه؟ بيقول جواه: ده بابا معندوش قلب ولا رحمه عشان هيصحى ماما وهى تعبانه طول اليوم عشان تعمله كبايه قهوة.

عارفه لما بتقولى لولادك: سيبوا بابا نايم عشان لو صحى هيتعصب عليكوا ويضربكوا ؟ ابنك بيقول جواه: ياااه ده بابا قاسى اوى ولو منمش هيضربنا وهيتعصب علينا وهيكرهوا ويبقوا خاييفين جدا من باباهم.

خلى بالك البنت و الولد بيتأثروا بتعاملات بابا وماما في البيت. فلو ماما هي بس اللي بتخدم وبابا مرتاح هيطلعوا كده. لان ولادنا عاملين زى التسجيل بيرصودوا كل كلامنا وافعالنا وبيخزنوها في العقل الباطن ويترجموها في تصرفات بشكل لا ارادى وتلقائى.

فلو البنت شافت ان الانوثه هي ان ماما بتسمع الكلام وتقول حاضر طول الوقت هتطلع كده. ولو الولد شاف ان الرجوله هو الشخط والعصبيه والصوت العالي طول الوقت هيطلع كده.

ولو البنات طلعت شايفه ماما واخده دور الرجال في البيت ومتحمله المسئولية من الالف الى الياء هتطلع البنت برضوا كده. فعشان كده لازم نكون واخدين بالنا من تصرفاتنا. لان الطفل رد فعل للى اتربى عليه وشافه وهيكبر وهيأثر على اختيارتهم وسلوكيتهم في حياتهم المستقله.

لازم كأب وأم نكون واعيين ونفلتر تصرفاتنا وندرس وننقذ اطفالنا ونعرف ايه اللي هيفيدنا وايه اللي يضرهم. وخليهم يطلعوا عندهم صورة مثاليه حلوة عنكم.

فلو أم مسيطره هنلاقى ابنها هيكبر وبيدور ياما على صوره عكس مامته تماما وحد هو يتحكم فيه ويمشيه ياما صورة زى مامته هي اللي تعمل له كل حاجه ولا يكون له أي اختيار.

الخطورة ايضا في

البنات لانهم شايفين كل الرجاله في ابوهم فلو ابوهم كويس يبقوا الرجاله كويسين ولو ابوهم مش كويس ممكن ستعقدوا من الرجال والزواج من اصله. فتصرفات الطفل في الكبر هي رد فعل لما تربى عليه وشاهده في البيت.

المشكلة كمان ان الصورة دى بتشوه حاجه جوه الطفل وتخليه مكبوت لأنه اتعود كل لما يتكلم يتصد فيطلع حاسس بالقهر ويتسبب في شرخ في شخصية الطفل.

فعلى كل اب وام لا يقلوا ان كل زواج به مشاكل وان يستسلموا للفكره لكن لابد من وعى بما يشاهده الاطفال منا من تصرفات ورد فعل وكلمات ومعاملات هل تقوم على الاحترام ام الاهانه ولازم احمل على عاتقى عبء التغيير لمصلحه اطفالنا ولازم اعلم انها مسيره مستمرة من التغيير كل يوم.

علم طفلك حريه التعبير لان مش معنى انه بيتكلم بحريه انه بجح وقليل الادب.

علم طفلك يعارضك ويقول ” لأ ” لأنه لو اتعود يسكت على كل حاجه مش هيقدر يحمى نفسه لما يتعرض لايذاء من الخارج وهنبقى احنا السبب.

لازم كل أب وام يقعدوا مع بعض ويتفقوا يحلوا مشاكلهم بهدوء مش لازم تورط طفلك في صراعاتكوا سوا لأنها هتؤثر على نفسيته وتطحنه وتطلعه طفل حزين وكئيب ومعقد.