ملف العناية بالشعر لكل عروسة شعرك سوف يصبح كالهنود

الشعر هو تاج كل عروسة وأمرأة لذلك هنقدم لكم ملف العناية بالشعر المتكامل ازاي تزيدي طول شعرك وتجعليه ناعماً كشعر الهنود ،النصائح التي سوف نقدمها  دى من دكتور اجنبي ذكى جداً .

هنبدأ بنظام العناية بالشعر هيغير شعرك 180 درجه ولمدة 3 شهور

ملف العناية بالشعر لكل عروسة شعرك سوف يصبح كالهنود

هنقدملك 12 خطوه تمشي عليهم من غير وصفات وخلطات وزيوت وبيض ومايونيزىطول فتره العلاج الخطوات دي ناس كتير  جربتها وجابت فعلا نتيجه خطيرة، اعملي الخطوات دي كلها مع بعض وان شاء الله شعرك يتقل ويطول المهم تستمري على الاقل تلات شهور .اشمعنى تلات شهور؟ مخضوضة لان الشعرايه مش بتبتدي تتأثر بأي حاجه قبل على الاقل تلات شهور علشان دوره تجديد الشعر .

وبعدين مش فتره طويله على فكره ما شعرنا مبهدلينه بقالنا سنين .وبعدين ياما جربنا خلطات وزيوت وعك كتير وبقالنا سنين طويله بنعك  ، يبقى نصبر على الاقل تلات شهور وياريت يبقى اكتر كمان ويبقى ده اسلوب تعاملنا مع شعرنا .

الخطوات مهم تعمليها كلها مع بعض ولو مقدرتيش يبقى معظمها

الخطوة  الأولى

اتأكدي ان مفيش عندك انيميا لو في عالجيها الأول لأنه عمره ما هيتقل لو عملتي ايه وفي انيميا. وكمان مهم اوي الحاله النفسيه تبقى كويسه لان التعب النفسي بيوقع الشعر بهبل وعن تجربه . طبعا بيبقى غصب عننا . لكن اهو نحاول . وربنا يعينا

الخطوة الثانية

ارمي فرش الشعر اوعي تستخدميها خالص الفرش بكلام الدكاتره بتقطع الشعر وهي بتسرحه بلاش الامشاط البلاستيك وهاتي مشط خشب حلو كده سنانه واسعه واستعمليه وبلاش ابو ايد ده استعماله صعب هاتي المشط العادي واسنانه تكون معقوله لا واسعه اوي ولا ضيقه اوي .

وفي انواع بتبقى مقسومه نصين نص واسع ونص ضيق هاتي ده لو عاوزه هتقولي بيقطعلي شعري يبقى نوعه وحش خشبه خشن هاتي نوع الخشب بتاعه ناعم بيبقى كأنه مطلي كده علشان ميمسكش الشعر ويقطعه هتقولي مش بعرف استعمله هقولك اتعودي . بجد والله يابنات بيفرق

الخطوة الثالثة :

هاتي من الصيدليه حاجه اسمها لوسيون الو بانثين ده شكله ده لوسيون للشعر ترجيه كويس وبعدين تبلي صوابعك منه كل يوم قبل النوم وتدلكي فروه راسك ، ولو عندك بخاخه تحطيه فيها يبقى افضل اهم حاجه ترجيه كويس قبل الاستخدام وترشيه في فروه راسك وتدلكي بالراحه الله يكرمك

دلكي كويس خمس دقايق كده كل ليله قبل النوم وبعدين سرحي شعرك وشوفي اذا كنتي بتلفيه او بتعملي فيه ايه اهم حاجه ميكونش مشدود وبلاش تغطيه بحاجه خليه متهوي عادي هو من اي صيدليه سعره حوالي 9 جنيه وبيكفي كتير بتاع اربع خمس شهور يعني متستنيش نتيجه قبل ما تخلصي العبوه كلها.

الخطوة الرابعة :

لو بتخرجي و مغطيه شعرك كتير لازم تحطي تحت الطرحه بندانه قطن لازم بقولك اهو هاجي افتش وراكي. وبلاش الله يكرمك السبعين الف طرحه دول الصيف جاي وشعرنا حرام اللي بنعمله فيه . طرحتين كفايه اوي بلاش ابوس ايديكو عمة سندباد اللي بشوفها دي.

الخطوة الخامسة :

اول ما تروحي البيت فكي شعرك وسيبيه يتنفس بلاش تربطيه او تعمليه كحكه والحاجات الغريبه اللي بنعملها احنا المصريين في شعرنا دي والله حقه يقع ويسيبنا ويطفش فكيه وهويه ولو بتدايقي منه وهو مفكوك اعمليه ضفيره مهويه كده بلاش تشديه المهم يبقى مفكوك ومتهوي على اد ما تقدري

الخطوة السادسة

وانتي خارجه تحت الطرحه او وانتي في البيت كل يوم افرقي شعرك من ادام فرق مختلف  يعني يوم هاتيه من قدام على جنب ويوم الناحيه التانيه يوم على ورا يوم على ادام كده يعني علشان لما بنعمله على طريقه واحده كل يوم الشعر بيتنحل ويبقى خشن اوي نتيجه احتكاكه بالطرحه او بالمخده او او والدليل على كده ان شعرك من تحت من عند رقبتك لو قلبتيه هتلقيه ناعم اوي انعم من ادام . لو لقيتي الحركه دي اعرفي انك بهدلتي شعرك من ادام اوي .

الخطوة السابعة :

ودي مهمه اوي لما تيجي تغسلي شعرك متحطيش الشامبو على شعرك مباشره لا خودي معاكي كوبايه فاضيه او ازازه شامبو فاضيه اي حاجه وحطي فيها شويه شامبو وخففيه بالميه ورجيه كويس لحد ما يعمل رغوه وبعدين بلي شعرك كويس اوي وحطي عليه الشامبو المخفف ده والله يا بنات دي نصيحه دكتور اجنبي وطبقتها هتفرق معاكى كتير  , حتى لو عامله حمام زيت الشعر بيرغي من اول مره ومش بحتاج اغسله تاني غير طبعا انه بيوفر في الشامبو

الخطوة الثامنة

نوقف السشوار والمكواه والفرد والصبغه والحنه والمايونيز والزيوت والبيض والجرجير والخلطات والعك والحاجات دي كلها وقفيها بس فتره العلاج دي.

الخطوة التاسعة :

هاتي فيتامينات اسمها فيتا زنك العلبه بخمسه جنيه فيها تلاتين حبايه خدي واحده كل يوم بعد الغدا كورس شهر وبعدين وقفي شهر وهكذا  اختياريه الخطوه دي بس بتفرق . يعني لو واحده بتاخد فيتامينات معينه او الدكتور كاتبلها حاجه معينه يبقى تستمر عليها و ده شكل العلبة.

الخطوة العاشرة :

ودي مهمه اوي بردو انك يوميا تاخدي معلقة زيت زيتون على الاكل بتاعك حطيه بقى على سلطه ابلعيه كده انتي حره المهم انه يتاخد على البارد يعني ميتسخنش ولا يتحط مع اكل سخن ممكن تقولي طيب ما احطه على شعري علطول ،هقولك علمياً فوايد اي حاجه لما بتحط على الشعر أو البشره بتوصلنا منها فقط 11% من فايدتها لما بتتاكل طيب ما ابلعها احسن .

وكمان اخذ ملعقة زيت زيتون ع البارد يوميا يحسن الشعر جدا ويعطيه ليونه ولمعه طبيعية وكمان لو قدرتي تاخدي فص ثوم متقطع قطع صغيره وتبلعيه زي حبوب الدوا كده يبقى ممتااز لو بتحبي الثوم متقطع على السلطه يبقى بردو كويس المهم انه بردو ميطبخش ولا يتقطع قبل اكله بفتره طويله

إيه فايدة الثوم للشعر : بيتقل الشعر بدل ما تحطيه على فروة الراس ويعمل ريحه وحشه ويعمل التهاب في فروة الرأس ومش بنستفيد منه الا 11 % يبقى ابلعيه أحسن مضاد حيوي قوي جدا ومفيد لإزاله حبوب الوجه .و  فوائد الثوم كثيرة . المهم حاولي ومتقلقيش مش هتحسي بطعمه ولا هيبقاله اي ريحه لو قطعتيه واخدتيه بشويه ميه كأنه دواء

الخطوة الحادية عشر :

ودي بقى اهم اهم اهم خطوة اشربي ميه كتير جداً وحده سألت مره دكتوره علا حسام اللي بتطلع مع امينه شلبايه عن علاج لتقصيف الشعر قالتلي بنات كتير بييجوا يكشفوا علشان تقصيف وهيشان الشعر وتساقطه
ولولا انهم هيقولوا عليا نصابه ومكتبتش على دوا . كنت قلتلها علاجك بس تشربي ميه . مش اقل من لترين ميه في اليوم ! ليه بقى . الشعرايه زي الزرع ..لما مبتشربش ميه من جذورها بتنشف والبصيله تموت وتقع . والاطراف تتقصف وتهيش. يبقى نشرب ميه كتير سهله وحلوه اهي .

الخطوة الثانية عشر :

مهم جدا ترطبي شعرك بحمام كريم بعد كل مره تغسليه . بلاش بلسم خليكي في حمامات الكريم احسن الف مره. ممكن تستخدمى كريم فاتيكا.

بالنسبه للمنتج للشعر وحلوه جدا عن تجربه

1- سيروم تريس علشان تقصيف وهيشان الشعر
هو بيدي لمعه رهيبه للشعر . غير انه علاجي يعني اتنين في واحد . يستخدم على الشعر المبلول او الناشف بدل الكريم والزيوت على الشعر فقط مش على فروه الراس علشان ميسدش المسامات

2- تونيك الفازلين (من محلات مستحضرات التجميل) بينعم الشعر  وبيديله لمعه جميله بالذات الشعر الخشن والهايشلافي منه الاصلي سعره من 35 لـ 40 المضروب كان بـ 15

طبعا في فرق فيهم اتأكدي انه صناعه هندي وعليه علامه دهبيه مدوره كده كلمه الاصلي يستخدم نقطه صغيره اوي منه علشان ميلزقش على الشعر المبلول او الناشف بدل الكريم والزيوت على الشعر فقط مش على فروه الراس علشان ميسدش المسامات

علشان الشعر المقصف والهايش شعرك بعد ما تغسليه نشفيه بالراحه وسيبيه ينشف حاجه بسيطه يعني يبقى بين المبلول والناشف قبل ما يبقى هايش يعني وحطي في ايدك نقطه سيروم تريس على نقطه تونيك الفازلين واخلطيهم في ايدك وبعدين دلكي بيهم شعرك بالراحه بس من غير فروه الراس..وبعدين سرحي شعرك ولفيه بجد طريقه روعة  عن تجربه

3- زيت ترشوب : عند عطار بـ 30 جنيه اتأكدي انه الاصلي وعليه علامه مائيه تحطيه على شعرك وهو بين المبلول والناشف بجد بيدي لمعه حلوه اوي بلاش تحطيه على فروه الراس، حطيه على الشعر كل ما تحسي ان شعرك ناشف حطي شويه ودلكي الشعر بالراحه مش هتشوفي نتيجه قبل تلات شهور او اربعه.

 نلخص الخطوات بقى :

1- نعالج الانيميا
2- نرمي الفرش والامشاط البلاستيك ونجيب مشط خشب
3- نجيب الو بانثين لوسيون وندلك بيه فروه الراس كل يوم قبل النوم
4- بندانه قطن تحت الطرحه
5- نهوي الشعر طول ما احنا في البيت
6- نغير الفرق من ادام بتاع الشعر كل يوم فرق ناحيه مختلفه
7- نخفف الشامبو بميه قبل الاستعمال
8- نوقف السشوار والمكواه والفرد والصبغه والحنه والخلطات ونريح شعرنا شويه
9- خدي حبايه فيتازنك كل يوم بعد الغدا (اختياري الخطوه دي بس بتفرق)
10 – معلقة زيت زيتون كل يوم ع البارد وفص ثوم مقطع نبلعه كأنه حبه دوا
11- نشرب مالا يقل عن لترين ميه يعني من 8 – 10 كوبايات ميه في اليوم
12- مهم جدا تستعملي حمام كريم يرطب شعرك ويغذيه.. وكمان الزيت او الكريم او السيروم المناسب

استعملي منتجات مناسبه لشعرك بلاش منتجات قويه او غير مناسبه لشعرك ..

الترشوب أو التريشوب ده زيت هندي بيتباع عند العطارين الكبار أو أونلاين ع النت سعره يتراوح ما بين 35 بالكتير 45 جنية لا يزيد عن كده ( غير كده بيبقى بيطلعوا مصلحة منه ) بيعمل على نعومه الشعر و طوله العلبة الأصلية بتاعته من جوه بلاستيك مش إزاز و الزيت نفسه لونه أخضر أو زيتي غامق يعني و ريحته مش وحشة بالعكس مقبولة .

لو شعرك واخد على الزيوت عموما بيتحط بعد غسيل الشعر يوم مثلا و يتغسل و لو مش واخدة على استخدام الزيت بيتعمل حمام زيت قبل الدش بساعتين و فوطة سخنة تتلف ع الشعر و طريقة عملها بتحطي الفوطة في ماية سخنة و تعصرية و تلفي شعرك بيها و ممكن تجيبي معاه زيت الزباد ( بس ده ريحته صعبة ) العلبة الصغيرة منه بالكتير 15 جنية و بيعمل على إنبات الشعر ( دي تجربة ناس شوفتها ع النت ) و طبعاً النتيجة بتبان مع الإستمرار .