لو عايزة ترجعي عروسة من جديد وتظبطي نفسك في يوم واحد بس قبل العيد وهتبقي جميلة فلة شمع منورة وكلها بحاجات طبيعية ومش مكلفه هنقدملك نصائح لجمالك في يوم واحد بس قبل العيد.
نصائح لجمالك في يوم واحد بس قبل العيد
بصي بقي اليوم ده مايكونش وراكي حاجة خلصي وأفرشي الجمعة وجهزي كل حاجتك.
خلي يوم الوقفه لنفسك وبناتك بس.
تصحي من النوم تاخدي دش ع الماشي وتصلي وتسرحي شعرك وتحطي زيت زيتون وتلفي شعرك كحكة للأمام
تخلي الكحكة عند جبهتك عشان لما تفكيها هتلاحظي إنه أتفرد
وتمسكي جسمك بالسويت وتزيلي كل العنكبوت اللي عندك معظم الوصفات لإزاله الشعر الزائد مش حلوة وبتسمر البشره أو بتقطع الشعرة
انما السويت بتشيل البصيله بتاعت الشعر من جذورها هتوجعك شوية بس طبيعية ونتيجتها روعه.
وبعدين تيجي لوشك وتعملي الماسك دا
المقادير:
معلقه كبيره نشا علي بياض بيضه ونقطتين مية ورد
وتسبيه لحد ماينشف خالص وإستغلي الوقت اللي هو وشك بينشف فيه دا وحطي حنه سمرا علي ضوافرك .
المانكير هيمنع الوضوء. وسيبي الحنه ووشك ينشفوا أوي وبعدين تغسلي الحنه وتيحي لوشك ماتغسليهوش افركيه بقماشه خشنه عشان يشيل الطبقة المتكونه من التراب والبكتريا من بشرتك وبعدها تغسلي وشك بميه فاتره
تقعدي بقي على الأنتريه أدام التليفزيون شويه وتنقعي رجلك الحلوة دي في ميه دافيه بخل وملح
وانتي نقعاها تدهني ايدك بكريم ترطيب أو فازلين عشان تبقي ناعمة وطرية وكلها حنيه وتفضلي نص ساعة أو يا ريت ساعة وتنشفي رجلك وبالحجر أو مبرد الرجلين وتشيلي الجلد الميت في رجلك وهو لسه طري بعد مانقعتيها.
وتدهنيها فازلين وتلبس كيس وعليه شراب وتفضلي بيه لاخر اليوم أو على قد ماتقدري
ونضفي ودانك بودانه ومناخيرك بنفافه عادي أي حاجه تقابلك نضفيها دا عيد يا حبيبتي وهنعيد
وبعد الفطار بقي تفنشي التشطيبات بتاعت الصبح تغسلي رجلك بميه دافيه وشيلي أثار الفازلين وخدي أجمد دش بقي واغسلي اسنانك وحطي زبده كاكاو او مرطب شفاه
ولو عايزه جسمك يبقي ريحته جميله هاتي ميه دافيه وانقعي فيها ميه او ورد او نعناع او ياسمين واقعدي مع نفسك وحطي ع جسمك كله وكل ما ينشف حطي تاني هتحسي انك مش محتاجه برفان خالص
والأماكن الحساسه ادهنيها مسك أبيض بيفتح البشره وبيدي ريحه لوقت اطول والبسي أحلي طقم بيتي او نوم عندك واستقبلي العيد بفرحه وبهجة
