سوف نقدم لكم في هذا المقال شوية نصايح لكل ست بيت تفيدك في المطبخ وتوفر لكي الوقت والمجهود
شوية نصايح لكل ست بيت
بعض النصائح التي تساعدك في البيت
-بتقشرى الباذنجان وبتقليه تلاقيه شال الزيت كله وشربه
الحل :طيب بعد ما تقشريه حطيه فى شوية مياه وملح وبعدين شوية فى الشمس صغيرين وبعدين اقليه
– عينك بتتشحطف وانتى بتعملى البصل وبتقطعيه
الحل : قبل ما تقطعيه حطيه نص ساعه فقط لا غير فى الفريزر وبعدين قطعيه
-عندك حلل الومنيوم لونها بيغير عايزة ترجيعها تانى يلا شوية خل وليمون وادعكى
ولو عندك ورقة فويل كرمشيها وادعكى بيها يا قمر وبعدين مايه وصابون وشوفيها وتعالى قوليلى
-لهلوبة فى المعجنات وشغالة بيض ولبن واديلو فى الخلط ويتعبك فى الغسيل
الحل :حطى شوية ملح وقشر ليمون وميه سخنه واضرب بالخلاط شوية صغيرين خالص
وبعدين بالميه واشطفى
– بتحمرى اللحمة والسمنة بتطرطش ومشوهة ايديكى ووشك عارفة انا الشكل ده
طيب رشى شوية ملح صغيرين للسمنة
– عندك مطحنة وطحنتى توابل والريحة مش راضية تروح وعايزة تطحنى سكر
الحل : اغسليها واطحنى فيها شوية عيش محمص
– عندك نمل وعمال يفتح ويخرم وهيهد البيت عليكو بعد الشر
الحل :شوية خل تفاح مع مايه ورشى مناطق التجمع بتاعته المنبع يعنى
شوية نصايح لكل ست بيت
– عندك بواقى دهنيه فى قلاية التحمير اديها دعكتين الاول بورق جرايد وبعدين بالصابون
– بتحمرى اللحمة والسمنة بتطرطش ومشوهة ايديكى ووشك عارفة انا الشكل ده
الحل : طيب رشى شوية ملح صغيرين للسمنة
– الملح بتاعك بيرطب فى علبته
الحل : حطى كام حبة رز جوا العلبة
– بتحطى سلة القمامة بتاعتك قدام باب الشقة وشوية وبتسمعى حفلة قطط بتتغدى وسابوا الاكل من غير ما يحاسبوا وبهدلوا الدنيا حطى شوية نشادر ع السلة من فوق
– عملتى نفسك فلحوسة شاطرة وحطيتى التوابل بالنظر والشطة ولا الفلفل الاسود زادوا
واتلهلب طيب حطى معلقة او معلقتين لبن ع الاكل بس يكون دافى مش ساقع
– عندك ذباب كتير او دبان مش فارقة ههههه طيب اصيص صغير ازرعيه ريحان او نعناع
الروايح اللى بتطلع منه بتطرد الذباب طردة الكلاب
– كلتى اكلة باذنجان بالخل والتوم يلا بسرعه حطى عودين بقدونس فى بوقك وامضغى
طيب التوم ريحته مالية ايديكى قشر الليمون وادعكى وبعدين اشطفى
– بتعملى عصير اى نوع فاكهة وتحطيه فى دورق وتحطيه فى التلاجة كده غلط لان فيتامين ج اللى فى العصير بيبوظ بمجرد تعرضه للهواء يبقى نحطه فى ازايز او زجاجات
