بنتفاجأ كتير بتليفون من احد اصحابنا او قرايبنا او حد من العيله وبيقولنا انه جاى يزورنا دلوقتى وهى مسافه السكه وهيكون في بيتك . طبعا بتلطمى لان البيت بيكون ملغبط وبتكونى مش مجهزة اى حاجه ولا مجهزة نفسك . وهنقدم ليكى نصائح لتجهيز المنزل للضيوف وإستقبال الضيوف في 30 دقيقة .
نصائح لتجهيز المنزل للضيوف وإستقبالهم في نصف ساعة
اولا :
قومى بازاله كل الملابس والاغراض الموجوده في الصاله وعلى الانتريه لأنه ده اكتر مكان لازم يكون نظيف
ولو مقدرتيش تشيلى كل حاجه في مكانها حطيهم كلهم في اوضه واقفى بابها عشان ميبنش انها ملغبطه.
ثانيا :
بلى قطعه من القماش وامسحى بسرعه طرابيزة الصاله من اى بواقى اكل او اى اتربه عليها.
ثالثا :
رشى معطر جو في انحاء الشقه بسرعه عشان تشيل اى ريحه للاكل خاصه لو كان سمك او اى حاجه ليها ريحه نفاذه مش لطيفه قدام ضيوفك زى كرتب او قرنبيط.
رابعا :
ادخلى بسرعه على الحمام لان من المحتمل يستعملوة فلازم تانى حاجه تهتمى بيها بعد الصاله
قومى بسرعه بجمع الفوط القديمه وحطى فوط ناشفه ونظيفه وحطى بكره مناديل جنب التواليت
ونشفى الحمام من اى ميه على الارضيه ممكن تزحلق اللى يدخل وبكده يكون حمامك جاهز.
نصائح لتجهيز المنزل للضيوف وإستقبالهم في نصف ساعة
خامسا :
بعد ما وضبتى بسرعه الصاله ولمعتيها وحطيتى كل المخدات اللى كانت مرميه في كل حته على الانتريه ونشفتى الحمام كويس لازم تستعدى بقى لاستقبال ضيوفك
ادخلى غيرى لبسك واتهندمى لان اول امر يلاحظه الضيوف هو شكلك مش بيتك وحطى كده مكياج خفيف وبرفان يطير ريحه الاكل منك.
سادسا :
طبعا مفيش وقت تعملى اى تقدميها لضيوفك ممكن تبعتى البواب او حد من افراد البيت يشتروا من اقرب سوبر ماركت لتر بيبسى وقالب كيكه جاهز مش هيكلفك 10 جنيه
وقطعيه قطع وممكن لو عندك فواكه قطعيها عالسريع وحطى شويه على كل قطعه كيك هتبقى شكلها حلو و
كأنك وقفتى في المطبخ عملتيها لضيوفك حاجه هتشرفك.
ولو في غرف غير نظيفه اتاكدى ان بابها مقفول عشان اللى قاعد في الصاله مش يشوف بهدله الشقه والفوضى اللى في البيت .
