اكثر حاجه بنعانى منها أحنا كستات وربات بيت هي تنظيف البيت خاصه مع وجود اطفال . ويتحول البيت لكتله ورق وهدوم هنا وهناك وصعب تلاقى فيه مكان هادى لكن شكله يبقى بيوتر اعصابك . عشان كده هنقدم ليكى نصائح لتنظيف البيت أوضه أوضه كويس وتخليه بيلمع .
نصائح لتنظيف البيت
اولا : حجره النوم :
اول حاجه تنزعى الملايات واكياس المخدات وترميهم في الغساله وتنفضى المرتبة كويس .
وياريت لو تطلعى المخدات والبطاطين في البلكونه يتعقموا في الشمس كويس يبقى تمام التمام.
لو لقيتى بقعه في المرتبة متطنشيش لكن خدة حته قماش مبلوله ميه وحطى عليها شويه مسحوق غسيل وادعكى فالبقع هدى لحد ما تروح وسيبى المكان ينشف قبل ما تفرشى ملايات جديده.
روحى بقى هاتى ملايات نظيفة واكياس مخدات يكونوا متناسقين مع بعض او طقم على بعضه وافرشيهم .
روحى بقى على التسريحه رشى ملمع زجاج ونضفى المرايات بورق جرايد وخليها تلمع كده.
لو الادراج مكركبه فضيها وأفرزها محتواها لو لقيتى اكياس فاضيه او ازايز مونيكير فاضيه او حاجات ملهاش لزمه ارميها علطول هتريحك في المرات الجايه وانتى بتنظفى .
امسحى التراب عن ازاير البرفان المركونه على التسريحه او أي كريم شعر او علبه مكياج.
افتحى بقى شباب الاوضه وخلى الشمس تدخل تعقم الاوضه .
افتحى الدولاب بقى وده الهم الكبير ورتبيه كويس وياريت تخصصي مكان للبيتى لوحده والخروجى لوحده عشان يوفر عليكى … وعلقى لبس جوزك كده عالشماعات وخليه فرحان بيكى وبنظفتك .
لو هدوم محتاج تتكوى طلعيه واخر اليوم اكويها او يوم تانى او حتى وديها المكوجى .
اكنسى الاوضه كويس وتحت السرير وزقى التسريحه واكنسى تحتيها وياريت قبل ما تكوني فرشتى ملايات السرير عشان التراب ميطلعش عليها.
بعد كده هاتى جردل الميه حوتى شويه مايه دافيه عشان تنظف الارضيات كويس مع نقطتين ديتول او أي منظف للارضيات وادعكى الارضيات كويس خليها تلمع . وسبيها تتهوى شويه وتنشف.
نصائح لتنظيف البيت أوضه أوضه وتخليه بيلمع
ثانيا: الصاله:
اول حاجه تعمليها تلمى السجاده كده وتطلعيها ياما على السلم او في البلكونه وتنفضيها كويس تطلعى منها تراب السنين وتسبيها تتشمس شويه.
ترجعلى للصاله بقى تكنسيها كويس وتحت الكنب كويس وتنفضى الكنب وتمسحى حوافيه لأنها بتكون مخزن تراب.
ياريت من وقت للتانى كده تغيرى مكان الانتريه والكنب عشان تحسى بتجديد كل شويه .
لو في دولاب للتلفزيون بقى تنفضيه كويس وتلمى الدبابديب المرصوصه عليه وتخديها غسله في الغساله عشان تنضف وتلمع .
لو في أي تحف او أي اكسسورات على التربيزة : هاتى طبق كبير مليان شويه ميه ومسحوق غسيل ونقعيهم فيها ثم سبيهم يتصفوا منها كويس ونشفيهم وارجعى رصيهم تانى هتخلى الصاله كأنها جديده .
نضفى التلفزيون كويس والريسيفر لان عليهم كوم تراب بيبقى شكلهم وحش جدا خاصه قدام ضيوفك .
امسحى الارضيات كويس ولما تنشف رجعى السجاه مكانها .
ثالثا: حجره الاطفال
ياريت تعلمي اطفالك أزاي يكونوا منظمين وتطلبى منهم يساعدوكى في تنظيف غرفتهم.
طبعا اول لما تدخلي الاوضه هتصيبك الكأبه لكن متعويش الهم هنوريكى بسهوله أزاي تنظفيها .
هاتى علب بلاستك كبيره بتاع الغسيل دى وخليها في الاوضه وخلى اطفالك يجمعوا العابهم فيها وعلميهم لما يخلصوا لعب يجمعوا العابهم فيها.
حطى في اوضتهم سله زباله بغطا عشان لما ياكلوا حاجه ميرموش الورق في الارض ويحطوها في سله الزباله.
افتحى الدولاب وشيلى أي لبس مش نظيف لان الاطفال كله عندهم خبر خير ويخلعوا ويزقوا في الدولاب فأفرزيه كويس لأنك هتلاقى اغلب لبسهم في الدولاب موسخ ومحتاج غسيل.
وغيرى ملايات السرير ونفضيى من عليه أي بقايا أكل او قصاقيص ورق.
وتخديها كده بالمكنسه وبعد كده تمسحيها وتهويها كويس .
رابعا: المطبخ :
اول حاجه تعمليها انكى تجمعى كل الاكواب او الاطباق او احلل من انحاء البيت وتحطيها على الحوض .
بعد كده تمسحى الرخامه كويس او تربيزة المطبخ بالمنظف عشان تشيلى أي ميكروبات عليها خاصه لو مقطعه لحم او فراخ نيه بيبقى المكان مليان سالمونيلا فلازم تنظفيه كويس وتعقميه بديتول او شويه خل .
بعد كده تمسحى البوتجاز كويس وتغسلى العيون كويس بالليفه السلك عشان يبقى كأنه جديد.
خدى بقى المواعين غسيل وشطف وسبيها تتصفى قبل ما تشليها عشان متعفنش. .
امسحى بقى الارضيات لازم بماء وكلور عشان تتعقم كويس وسبيها تنشف وتاخد راحتها.
