سنقدم إسكتش بسيط حتى يتعلم الطفل عن مخاطر سوء التغذية عند الاطفال فيمكنك أن تمثليه بدميات طفلك أو تطبعي شخصيات الإسكتش من النت على ورقة وتمثليها
لعبة بسيطه تجنبنا سوء التغذية عند الاطفال
الفكرة:
هي عمل إسكيتش بسيط بين طفل والطبيب ووالدته ويمكنك استخدام دميات الطفل نفسه لعمل هذا الإسكتش أو عن طريق رسومات ملونة لصورة طفل وصورة طبيب ومثلي هذا الإسكتش مع تغيير نبرة الصوت.
الهدف:
أن نعرف الطفل خطورة سوء التغذية ، فمعظم أطفالنا لا يحبون تناول الطعام المغذي بكل أنواعه سواء خضروات وفاكهه أو لحوم ودجاج ويسرعون للمتجر لشراء البسكوتات والحلويات والشيكولاتات
فيجب أن نحذر الطفل من تأدية هذه العادات السلوكية الغير صحيحة والتي قد تؤدي به إلى المرض
نص الإسكتش ليساعدنا علي تجنب سوء التغذية عند الاطفال :
الطفل يعود من المدرسة ويبدو عليه علامات التعب والإعياء
ماما : مالك يا حبيبي شكلك تعبان خالص في أية ؟
يرد الطفل بصوت خافت : أيوة تعبان يا ماما حتى في الفصل مش قادر أركز في شرح المعلمة للدروس ولما خرجت الفسحة كانوا كل أصحابي بيلعبوا ويجروا وأنا تعبان ومش قادر أقف وأجري زيهم وحاسس إني دايخ
ماما : لازم نروح للدكتور حالا
” تخرجي دمية الطبيب أو صوره طبيب مطبوعة على ورقة مع تغيير الصوت لصوت رجل أو صوت غليظ ”
الدكتور : أهلا وسهلا خير في أية يا حبيبي ويسرد الطفل الأعراض التي أخبرها لوالدته
الدكتور : لازم نعمل تحليل دم ونشوف في أية ؟
ياااااااااه أنت أكيد مش بتاكل كويس يا حبيبي لأن عندك سوء تغذية وأنيميا يعنى فقر في الدم
يرد الطفل : لا أنا باكل شيكولاته وبسكوت وبشرب كل يوم عصير
الدكتور : ده أكل مش مغذي خالص وأدي النتيجة بندوخ ونتعب ومش بنقدر نلعب ولا نركز في المذاكرة
يرد الطفل ويبدو عليه الحزن الشديد : طب أعمل أية يا دكتور
رد الدكتور : هقولك شويه نصايح بس توعدني إنك تنفذها عشان تخف وتبقى كويس ونشيط وتجري مع أصحابك وتذاكر كويس وتبقى من الأوائل
يرد الطفل : أوعدك يا دكتور حاضر هنفذ كل اللي هتقول عليه
سوء التغذية عند الاطفال
رد الدكتور وقال:
أولا: لازم ناكل كويس وفي الغدا ناكل قطعة لحمة أو الفراخ أو السمك اللذيذ اللى ماما طبخاه
ثانيا: ناكل خضار كتير مش بس قطعه اللحم لكن ناكل شوية سلطة وياريت لو جرجير أما أكتر نوع خضار يعالج الأنيميا هو الملوخية والسبانخ
ثالثا: لو هنشرب عصير نحط عليه عسل أسود بدل السكر لأن العسل الأسود مليان حديد وكالسيوم ونحاس وبوتاسيوم ودي حاجات مفيدة جدا لجسمنا .
رابعا: بعد الأكل ناخد فاكهة بدل الشيكولاتة يعني ناكل تفاح أو موز أو كمثرى أو بلح كلهم فيهم حديد وهيساعدونا نخف بسرعة.
خامسا: كمان ناكل بقوليات كتير يعني ممكن نطلب من ماما بدل ما نشتري لب نتسلى بيه تعملنا حمص نتسلى بيه وكل الحاجات دي هتخليك تخف بسرعة وميبقاش عندك أنيميا تاني
ثم يشكر الطفل الدكتور ويهز رأسه وعدا منه أنه سيعتني بصحته وغذائه
أسئلة للطفل بعد الإسكتش :
س: لماذا مرض الطفل؟
س : ما النصائح التي قدمها الطبيب ؟
س: ما الطعام الذي يجب أن نتناوله بكثره ؟ وما الذي يجب أن نبعد عنه لأنه غير صحي ؟
.
