هنقدم طريقة عمل البرجر بفول الصويا على طريقتى سهلة وموفرة لاها بتزود كمية البرجر وكمان فول الصويا مفيد للاطفال جدا وبيدى البرجر طعم رائع والطريقة بالخطوات مصورة
طريقة عمل البرجر بفول الصويا بالصور
انا عملت كيلو لحم مفروم عملى حوالى 22 قطعة كبار او اكتر
المقادير
- كيلو لحم مفروم
- 4 كوب ماء دافىء
- 2 ملعقة كبيرة بابريكا او فلفل حلو بودرة
- ملعقة كبيرة ثوم بودرة
- 2 بصلة كبيرة مفرومة او مبشورة ناعم
- ملح وفلفل اسود
- 2 ملعقة كبيرة نشا
- ملعقة بهارات
- 2 كوب فول الصويا ( خلطة جاهزة ) ثمن الكيس حوالى 6 جنيهات
– طبعا لو عوزين نعمل نصف كيلو لحم مفروم هناخد معاها نصف كمية المقادير.
وده شكلها متوفر بالسوبر ماركت واى هايبر ماركت كبير زى كارفور او فتح الله او اولاد رجب
الطريقة
ده شكل بروتين الصويا بناخد منه 2 كوب
ثم نضيف عليهم 4 اكواب ماء دافئ ونقلبه قليلا ونتركه حتى يلين ويمتص الماء وينفش حوالى ربع ساعة زى الصورة هنا قرب يتشرب كل كمية الماء
بنصفى اى كمية ماء زيادة فيه بعد ربع ساعة نقع
هنخلط بالكبة ولو مش متوفر يبقى نخلط بايدينا هنضيف الصويا بعد تصفيتها والبصل
واللحم والتوابل والملح والبابريكا والثوم البودر ونخلط جيدا حتى نحصل على قوام ناعم متجانس
ده شكلها بس لسه شوية نخلط كمان
شايفين بقت متجاسة وطرية
نفرد ورقة زبدة او ورقة بلاستيك وندهنها قليل من الزيت وفرد عليها جزء من عجينة البرجر ونحاول نساويها كويس كله سوى واحد
بطبق دائرى او قطاعة نقطعه دوائر
ونحاول نطلع الدوائر براحة
نرصها بطبق تحته ورق زبدة اوكيس
طريقة أخرى للتشكيل :
ممكن نعملها فى طبق دائرى بس نضع تحته كيس لسهولة خروجها.
بعد كده نرصهم بطبق ونعمل بين كل دور والتانى فوق بعض فاصل بالورق او الكيس البلاستيك وعلى الفريزر على طول نسيبها تتشمع ليلة كاملة عشان تبقى محتفظة بشكلها بعد التسوية وتبقى زى الجاهزة
طريقة عمل البرجر بفول الصويا و التحضير :
انا بدهن صينية تيفال زيت وارص فيها البرجر وعلى الفرن اشويها على نار عالية وممكن نحمرها فى طاسة فيها زيت على النار
بنحضر عيش كيزر و خس و طماطم وبصل و كاتشاب و مايونيز مع احلى ساندوتش و طريقة عمل البرجر بفول الصويا واللى بالبيت مش هيصدقوا انه بيتى وهيفتكروه جاهز والف هنا
