طوفى وباجزى قصة لتعليم الطفل عدم الخصام . لان اطفالنا مش بيعرفوا ازاى يتعاملوا مع اختلاف طباع اصحابهم . وازاى ممكن نزعل بس نصفى الزعل بينا من تانى ونرجع نتصالح ونكلم بعض تانى .
قصة لتعليم الطفل عدم الخصام
قصة طوفي وباجزي
كان طوفى ولد جميل اوى .وعنده اصحاب كتير . بس كان أقرب صديق له هو باجزى .
لانه كان معاه فى نفس الفصل . وكمان كان جيرانه فى العماره. فكانوا بيقضوا وقت طويل حتى برا المدرسه وهما مع بعض .
وفى يوم من الايام .كان طوفى وباجزى بيلعبوا سوا لعبه جميلة.
وكانت اللعبه انهم يرسموا خطوط على الارض بالطباشير. ويحاولوا يعدوا بين الخطوط من غير ما يدوسوا على الخط .
جه دور باجزى . وهو بيعدى بين الخطوط لمس الخط .
راح طوفى قاله : خلاص انت خسرت لانك لمست الخط . واللعبه ممنوع تلمس فيها الخط .
رد باجزى : لا انا ملمستش الخط . انت مش بتشوف كويس .
طوفى: لا انا شايفك بعينى ومركز معاك . ولمست الخط .
المهم يا ولاد . قعد طوفى وباجزى يتخانقوا وقت طويل مع بعض .’
راح طوفى قاله : انا مش هلعب معاك تانى . انت غشاش . وانا مخاصمك .
رد باجزى : طب ماشى.. خلاص من النهارده مش هنكون اصحاب تانى . وافتكر انت اللى اخترت كده .
ومشى باجزى وهو زعلان خالص من كلام طوفى معاه.
وبالليل لقوا مامة باجزى بترن الجرس على طوفى وتسأله : فين باجزى ؟
رد طوفى : انا معرفش هو فين . اخر مره شفته لما كنا بنلعب . واتخانقنا . وقررنا منكونش اصحاب تانى .
رد بابا طوفى : غط كده يا طوفى . ادى باجزى زعل منك ومش عارفيين راح فين
رد طوفى: وانا مالى . احنا خلاص مش صحاب . ومش مهمه هيكون راح فين . ومش هزعل عليه لو تاه .
اسرعوا بابا وماما مع اهل باجزى ليبحثوا عنه حتى وجدوة .
شعر طوفى بالذنب . وراح اتأسف لباجزى . ورجعوا اصحاب تانى من الاول وجديد
مغزى القصة:
ان نعلم الطفل ان ممكن نزعل مع اصحابنا وممكن نختلف مع بعض.. لكن مش لازم نخاصم بسرعه. لكن نقعد ونحكى سوا فى ايه اللى بيزعلنا . ونرجع نتصالح تانى .
