احلى فطار القراقيش بالعجوة او الملبن بس بدل ما نشتريها من بره ممكن نعملها فى البيت بكل سهولة اوفر ليكى وكمان انظف عشان تبقى مطمنة اولادك بياكلو ايه هنا وبس طريقة عمل القراقيش بالعجوة بالخطوات والصور
طريقة عمل القراقيش بالعجوة بالخطوات والصور
المقادير:
كيلو دقيق
ملعقة كبيرة خميرة فورية
ملعقة بيكنج بودر
ربع كيلو زبدة او سمنة
ربع كيلو زيت نباتى
ثمن كيلو سمسم نظيف
ملعقة محلب مطحون
ملعقة صغيرة شمر
ماء دافىء للعجن
ملعقة سكر
ملعقة ملح
الحشو:
عجوة حوالى نصف كيلو او اكتر ويفضل ان تكون مفرومة وعليها سمن بلدى لتلينها وملعقة سمسم ويمكن اضافة ملعقة قرفة حسب الرغبة ولو ملبن يبقى حوالى نصف كيلو ملبن او اقل عليه سمن بلدى وسمسم
الطريقة:
يوضع الملح والبيكنج بودر والشمر والمحلب على الدقيق ونضع السمسم فى حفرة فى الدقيق ويسخن السمن والزيت جيدا ويوضع على الدقيق ويقلب جيدا فى هذه الاثناء نضع فنجان ماء دافىء به الخميرة الفورية وملعقة السكر ويقلب ويترك خمس دقائق نبسس الدقيق والسمن كويس بالملعقة حتى يبرد
ثم نبدا بفركه بايدينا جيدا حتى يتشرب الدقيق كل السمن والزيت ثم نضع فنجان الخميرة ونبدأ بالعجن مع اضافة الماء الدافىء بالتدريج حتى نحصل على عجينة لا تلتصق باليد وسهلة التشكيل تغطى وتترك ربع ساعة فقط لحين تحضير الحشوة
نبدأ فى عجن العجوة او الملبن بالسمن والسمسم واذا كانت ملبن ستفرد فى قلب العجين اما اذا كانت عجوة تشكل مثل الاصابع زى الصورة
ناخذ جزء من العجين ونشكله كورة ونفرده بالفرادة او النشابة على شكل دائرة او مستطيل ونضع على بداية حرفه اصبع العجوة مثل الصورة
نبدا بلف طبقة لتغطيىة العجوة ونقطع بالسكين ونكرر العملية على باقى العجين حتى ننتهى
كل مستطيل محشو عجوة نأخذة ونفرده بالنشابة قليلا مثل الصورة ونقطعه شرائح مثل القراقيش
زى كده ونبدأ فى رصه فى الصينية
بعد رصه كله فى الصوانى بالشكل ده نتركه ما لا يقل عن 3 ساعات حتى يخمر ويرتفع
ويمكن تقطيعه بدون فرض عشان نعمله كعب الغزال زى الصورة
بعد ان يخمر يخبز على درجة حرارة 200 او درجة متوسط فى الرف المتوسط حتى نحصل على اجمل قراقيش
يمكن عمل القراقيش سادة بدون حشو
وممكن نشكل الوجه بالشوكه وندهن الوجه صفار بيضة مع ربع ملعقة بن
والف هنا
ممكن نفرد العجوة على العجينة ونلفها اسطوانة عشان تدى الشكل الحلزوني وتقطع بالسكين قطع وتترك لتختمر ثم تخبز وبالهنا
