نصائح لكل حامل من الشهر الأول حتى الولادة

أول مرة في الحمل بيبقى معظمنا معندناش خبرة بشهور الحمل وماذا يحدث فيها، لذلك نقدم لكم نصائح لكل حامل من الشهر الأول حتى الولادة.

ربنا يثبت حمل كل حامل يارب ويرزقها بذرية صالحة سليمة، وربنا يرزق كل مشتاقة يارب العالمين بالذرية الصالحة، وربنا يخلى لكل أم أولادها ويجعلهم أولاد صالحين.

نصائح لكل حامل من الشهر الأول حتى الولادة

الشهر الأول:

ده لو اكتشفتى فى الشهر الأول لان فيه ناس بتكتشف الحمل وهى فى الشهر التانى

– طبعا أول لما نعرف بالحمل نصلى ركعتين شكر لله

– وتحطى ايدك على بطنك وتدعى للجنين طول شهور الحمل وتقولى (اللهم إنى أستودعك جنينى أمانة فأقسمت عليك يارب بـ لا إله إلا الله أن ترده إلىّ بعد تمام ال9 شهور سليما صحيحا معافى من جميع الأمراض والعيوب والتشوهات)

– وكل يوم قبل ماتنامى تحطى ايدك على بطنك وتقرى الفاتحة 7 مرات والمعوذتين وآية الكرسى تانى حاجة هو انك ماتجهديش نفسك خالص ياجميل اتدلعى وزقططى واتوحمى من أول ماتشوفى الخطين الحمر أو من أول ماتلمحى كلمة بوستيف

– لازم تاخدى الفوليك أسيد علشان مهم جدا مهم فى حاجتين أساسيتين أولهم انه بيحمى من الاجهاض المتكرر ربنا يبعده عن الجميع يارب، ثانيهم انه بيمنع تشوه الأجنة ربنا يعافى كل الأجنة يارب العالمين، و ده الجرعة بتاعته قرص يوميا 5 ملجم لمدة أول 3 شهور وبرضه بتاخده اللى ناوية تحمل قبلها ب 3 شهور كمان يابنات المثبت.

– لو الدكتور كتبلك على مثبت يبقى ضرورى تاخديه بانتظام يومياً سواء أقراص أو لبوس

– ماتكسليش أو تنسى لان الدكتور أكيد عارف حالتك وعارف انك محتاجاه

– وبرضه بيتاخد أول 3 شهور

–  احتمال الدكتور يكتبلك على اسبرين أو اسبوسيد علشان يسهل وصول الدم للجنين

–  هتعملى تحليل دم تشوفى فيه بعد الشر تكسوبلازما (قطط) ولا لأ علشان لو نسبة بسيطة تلحقيها من الأول

– وقفى بقى الشاى والقهوة والنسكافيه على أد ماتقدرى

– ممنوع نهائى القرفة والزنجبيل والبردقوش

– ممنوع أى أدوية الا باستشارة الدكتور وقراية النشرة 117 مرة زى ماكنت بعمل وفى الاخر برضه ماكنتش باخد أى علاج وكنت بستحمل أى تعب خصوصا تعب الأسنان ممكن لو أسنانك تعبتك تحطى عليها قرنفل

– ماتشربيش ولا تاكلى حاجة سخنة اوى ولا متلجة أوى خلى كل حاجة وسَط

الشهر الثاني:

مستمرين فيه على الفوليك أسيد والمثبت الوحم عند المعظم بيبدأ من الشهر ده وعلشات تخففى شوية من غممان النفس أو الترجيع يبقى ناكل بقسماط أو شابورة بيخففو جامد من الاحساس ده وكمان على أد ماتقدرى تقللى من الأكل المقلى هو اللى بيزود الغممان والترجيع.

الشهر الثالث:

– مستمريين على فوليك أسيد والمثبت

– من الشهر ده هتبدأ أهمية أكلك على البيبى

– يعنى تكترى من الخضار والفاكهة و نشرب ميه كتير مش أقل من لترين فى اليوم وهقولكم ليه فى الشهر الجاى

الشهر الرابع:

– هنبدأ الشهر ده ناخد أقراص الحديد والكالسيوم مهمين جدا ً ليكى وللبيبى

– فى الشهر ده الوحم هيبدأ يقل شوية بشوية

– فإبدأى كلى أكل صحى وبلاش أكل التيك أواى أو أى أكل أو عصاير فيها مواد حافظة وألوان صناعية

– هنعمل تحليل دم صورة كاملة وتحليل بول نشوف فيه بعد الشر أنيميا ولا لأ لان فيه حالات بتحتاج تاخدين قرصين حديد مش واحد بس وتحليل البول هيبين اذا كان فيه بعد الشر صديد أوبكتيريا أو التهابات فى الكلية أو أملاح.

– والحاجات دى لاازم تلحقيها لان بعد الشر ممكن يسببو ولادة مبكرة ماعدا الأملاح ضررها عليكى انتى بس هتتسبب فى ورم رجليكي وايديكي فى اواخر الحمل.

– وعلشان تتجنبى أى حاجة من دى يبقى تشربى لترين ميه يوميا وان شاء الله مش هيحصل أى حاجة من دى

– الضغط يابنات ركزو كل مرة تكشفوا فيها على الضغط، الدكاترة بيفضلو الضغط يكون واطى عن إنه يكون عالى بس إنتى تحاولى يكون دايما مظبوط.

– لان الضغط العالي ممكن بعد الشر يسبب تسمم الحمل ولو واطى زيادة عن اللزوم ممكن يخلى الدم مش يوصل للجنين كويس

– حاولى من الشهر ده تبدأى تلبسى هدوم أوسع شوية من هدومك العادية لحد آخر الحمل حتى لو ما لاحظتيش ان بطنك كبرت بس المهم ماتضغطيش على بطنك من أول الشهر ده.

الشهر الخامس:

– مستمريين على الحديد والكالسيوم

-هتبدأى تحسى بالإمساك بسبب أقراص الحديد حاولى على أد ماتقدرى، تتجنبى الإمساك غلط جدا فى الحمل ازاى تتجنبيه؟

– بإنك تكترى من السوائل والخضار والفاكهة اللى فيها ألياف والخس والبرتقال هما أكتر حاجتين نفعونى بصراحة

– اولى بقى الشهر ده تعملى كشف كده تشوفى فيه التهابات ولا لألانها برضه غلط على الحمل خصووصا للى هتولد طبيعي بإذن الله و دى علاجها بيكون لبوس لمدة 3 أيام وبعد كده كله هيبقى تمام ان شاء الله وبرضه تكشفى فى أى وقت لو لقيتى افرازات مع حكة

– لما هتنامى على جمبك فى الشهر ده هتبدأى تحسى بتقل جامد على الرجلين من فوق

– هتستمر للتاسع  وممكن انك تحطى مخدة بين رجليكى وانتى نايمة عشان تخففى من الالم دا.

الشهر السادس:

– مستمرين على الحديد والكالسيوم

– من الشهر ده تبدأى تتابعى وزن البيبى وتسألى الدكتور عن وزنه علشان لو كان مثلا أقل من الطبيعى الدكتور يكتبلك فيتامينات تزود الوزن ولو لقيتى الوزن قليل ماتقلقيش الوزن بيتضاعف فى آخر شهرين.

– لو جالك إسهال فهو كمان غلط جدا زيه زى الإمساك بس الفرق ان الاسهال ممكن بعد الشر يفتح الرحم والامساك ممكن يخلى البيبى ينزل تحت فى الحوض قبل المعاد الطبيعي لنزوله فلو جالك إسهال يبقى تاخدى فورا حاجة من دى وان شاء الله الإسهال هيروح على طول:
– بطاطس مسلوقة
– نص كوباية ميه تدوبى فيها معلقة نشا
– نص كوباية شاى بليمون

الشهر السابع:

– طبعا كل واحدة لما بتدخل الشهر ده بتبقى حاسة إنها ممكن تولد فى أى وقت وبسمع عن ناس تبدأ تتنطط وتجرى بقى وتقول خلاص كفاية 6 شهور محبوسين وكل حركة بحساب وعاوزين نجرى بقى طالما بدأنا السابع يبقى فى الأمان،لاا  لاا.

– انتى لازم حرصك يزيد علشان تقل البيبى هيساعد انه ينزل ويضغط لتحت أكتر وانتى مش عارفة اذا كان وزنه مناسب للولادة ولا لأ ولا تعرفى الرئة اكتملت ولا لأ فبراحة شوية فى الحركة

– هتعملى تحليل دم وبول كمان مرة الشهر ده علشان تشوفى نسبة الهموجلوبين علشان لو قليل الدكتور يلحق يزودلك جرعة الحديد علشان لو هتولدى قيصرية والهموجلبين قليل هتحتاجى نقل دم فلازم يطمن على نسبته

– برضه معانا الحديد والكالسيوم

– فى الشهر ده كنت هتحسى بهبوط مع ان الهموجلوبين ممكن يكون مظبوط ممكن تسالى الدكتور على حقن ديبوفيت لآخر الحمل.

الشهر الثامن:

– برضه  الحديد والكالسيوم معانا

–  الشهر ده هتوقفى الاسبرين أو اسبوسيد تماما عشان لو هتولدى قيصرية بيسببو نزيف

الشهر التاسع:

– في الشهر التاسع خلاص هتبقى ماما بعد أيام أهو ياستى

– ابدأى بقى جهزي شنطة الولادة اللى هتاخديها معاكى المستشفى:
– بامبرز مقاس مواليد
– 2 سالوبيت خارجى
– 2 سالوبيت داخلى
– كوفرتة
– شامبو وزيت وكولونيا جونسون (بيطلبوها فى المستشفى قبل ما أدخل غرفة الولادة علشان يحموه بالحاجات دى)
– قطن
– كحول للسرة
– وبودرة للسرة
– قميصين نص كُم
– روب وطرحة
– أولويز حجم كبير
– شبشب
– فوطتين
– فرشة شعر
– معجون وفرشة أسنان
– صابونة
– بويلر ويانسون وحلبة وسكر

– ابدأى امشى وكلى تمر بيسهلو الولادة الطبيعية