امهات كتير مشغوله دلوقتى وبتستعد للعام الدراسى الجديد وهنساعدك ونلخص ليكى اهم نصائح عند شراء المستلزمات الدراسية قبل ما تدفعى فلوسك في حاجات وتندمى بعدين او تضطري انك تشترى منها تانى :
نصائح عند شراء المستلزمات الدراسية
اولا الزى المدرسي
امهات كتير تقول ما في المدرسة مسموح بأى لبس لكن نصيحتى انك تعلمي طفلك انه يلتزم بالزى المدرسي كل يوم ده هيعلمه الانضباط وهينعكس على نفسيته ويشعر بالجديه انه رايح مكان مخصص للتعليم مش طالع خروجه عاديه زى مع اهله فيشعر بالجديه.
وينصح بشراء مقاسين من الزى المدرسي واحد مظبوط تماما على مقاس طفلك واخر اكبر درجه واحده تخليه لما يدخل فصل الشتا عشان الطفل بيكون لابس لبس كتير تحت الملابس المدرسيه او حتى لنهايه العام هيكون حجم طفلك اتغير بدل ما تشترى دلوقتى وكام شهر وتشترى تانى عالفاضى .
ثانيا :الشوزات
يفضل شراء الكوتشي سواء للبنت او الولد لأنه بيكون مريح اكتر وياريت من نوع نضيف حتى لو دفعتى فيه فلوس اكتر بس أتاكدى انه هيقعد مع طفلك طول السنه ويستحمل بدل ما كام شهر يتقطع وتضطرى تجيبى واحد تانى وخاصه الولاد بيلعبوا كتير وحركتهم بتخلى الاحذيه تتقطع بسرعه .
ويفضل ايضا للبنات لان لو جبتى شوز حلوة وشيك بفيونكه من قدام واتقطعت الفيونكه هتلاقى بنتك بتقولك عايزة واحده تانى ومش راضيه تلبسها فقصرى على نفسك من الاول وهاتى حاجه عمليه تعيش طول السنه.
ثالثا : الاداوت المدرسيه من كتب واقلام
طبعا في موسم الدراسة بتكون الحاج تدى غاليه عن طول السنه فأنصحك بلاش تشترى واحده واحده من المكتبات لكن شوفى محل بيبع بالجمله واشترى كميه هيبقى اوفر جدا ولو اتبقت حاجه يبقى نخليها للسنه الجايه او يزاكروا فيها اطفالك.
رابعا : شنطة المدرسة
يفضل في النقط هدى تحديدا انك متخليش اطفالك يشتروها معاكى لانهم هيتشدوا للشكل وهيلحوا عليك تشتريها حتى لو مش عمليه وكام شهر وتتخرم من تحت او تتقطع ويقلولك عايزين واحده تانى .
فأنزلى انتى اشتريهم ويفضل تكون نوعيه مش قماش ومتقسمه كذا جزء عشان جزء تحطى فيه سندويتشات الطفل وجزء تانى معزول للكتب المدرسيه بتاعته
ولكن في المدرسة بيضطر انه ياخد كل كتبه كل يوم فيفضل تشترى نوع يتجر بيد ترولى لأنها هتسهل عليه وتحافظ على عمودة الفقري من الانحناء نتيجة حمل كتب ثقيله.
خامسا : علبه السندوتشات ” اللانش بوكس “
متقوليش ما هلفله السندوتشات في كيس وخلاص لأنها هتتهرس وتبوظ وطفلك هيرميها مش هيستفاد بيها فيفضل شراء لانش بوكس بلاستك يسهل غلقه وفتحه عشان يحافظ على الاكل ويقدر طفلك يتناوله بسهوله.
