يوم الاجازة للأب اكتر حاجه بتضايق ماما من بابا انه بيكون شغال طول الاسبوع ومش بيشوفوه ويجى يوم الاجازة بتاعه يدخل الاوضه يبقى عايز ينام طول اليوم ومحدش يصدعه والعيال ميلعبوش عشان يسيبوا بابا ينام وماما متزعجوش عشان بابا ينام واباء كتير بتفكر ده من حقها طبعا لانهم تعبانين وطالع عنيهم طول اليوم في الشغل لكن هل فكرت ان ده ليه تأثير سلبى على علاقتك بمراتك وعلاقتك مع اطفالك ونصيحتي لك في هذا المقال يوم الاجازة للأب تسعد بيها أسرتك، ايها الاب العزيز : خصص يوم اجازتك لمراتك واطفالك.
يوم الاجازة للأب ممكن بحاجات كتير تسعد بيها مراتك وأطفالك
لكل اب ارجوك اقرأ كلامى ومتستهونش به من فضلك لأنه في غايه الاهميه
اكيد طبعا انت مطحون او حتى مجرد شغل على متكب طول الاسبوع . ويجى يوم الاجازة بتبقى عايز
تنفرد بيه لنفسك وراحتك ومزاجك سواء قضيته جوة البيت نايم طول وكاتب على باب الاوضه ممنوع الازعاج .
او مقضى يوم اجازتك مع اصحابك في كافيه او قهوة او نادى . طب مفكرتش انك خلاص مش عاذب
يعنى انت ليك زوجه , اطفال طب لما مش حاسس انك ليك دور في حياتهم اتجوزت لييه ؟خلفت ليييه ؟
طبعا من حقك تفكر في نفسك بس شويه مش علطول وناسى مراتك واطفالك .
وياعينى ممكن تكون مراتك هي كمان بتشتغل وتتعب طول الايام برا البيت وجوة البيت وانت ولا على بالك .
طب ينفع تفكر دقيقه معايا
في الوقت اللي ضاع من عمرك وانت رب اسره بس كلام في البطاقه لكن
اطفالك متعرفش هما كويسين ولا عيانين هما مستواهم ايه في المدرسة هما مين اصحابهم حولين ولا اصدقاء سوء ايه اللي بيحيوه وايه اللي بيزعلهم ؟
لو انت مش عارف ترد على أي سؤال من دول يبقى عذرا ايها الرجل تحتاج لمراجعه حساباتك يا بابا
لكن ايه رأيك تفكر بطريقه مختلفة معايا . وتعمل حاجات بسيطة هتقربك من اطفالك من غير مجهود حتى تعملها لما تقوم من النوم وتاخد كفايتك بدل ما بتخرج مع اصحابك او بتكون شبعت من النوم بس
تفضل نايم برضوا تعوض تعب الاسبوع وخلاص طب مش حرام ؟. مش اطفالك ومراتك ليهم حق عليك برضوا ؟ صح ولا ايه .
طب ايه رايك يوم الاجازة تعمل شويه حاجات حلوة وبسيطة تسعد بيها مراتك واطفالك هتقولى طب زى ايه ؟ هقولك قوم اتجمع مع اطفالك على تربيزة الفطار اللي طول الاسبوع بيفطروا لوحديهم وانت في شغلك
واستغل وقت الفطار حكى معاهم ايه اللي حصل طول الاسبوع وحسسهم انك متابع الدنيا معاهم ومهتم انك حتى بس تعرفها.
لما يجى وقت الغدا ادخل المطبخ ساعد مراتك في حاجه حتى لو هتغسل بس شويه طماطم وخيار وتعملهم سلطه .ساعتها هتحس انها متعاون معاها .
بعد الغدا هات شويه العاب من اوضه عيالك، واقعد العب معاهم وادخل لعالمهم ودنيتهم بحجمها الصغير واتبسط وياهم .
قبل العشا جمعهم يحضروا فيلم جديد كوميدى او كرتون اشتريته ليهم او حملته من النت واقعدوا كلكم
اسمعوه واضحكوا بصوت عالي مع بعض وابسطوا بعض مع شويه فشار و ترمس .
شفت انها افكار بسيطة ومش هتكلفك فلوس ولا مجهود ولا هتطلع اصلا من البيت لو انت تعبان .
لكن معناها كبير. وتأثيرها اكبرر .
