كيف اتصرف مع جوزي وأولادي لو تعبوني أو زعلوني

كيف اتصرف مع جوزي وأولادي لو تعبوني أو زعلوني، لو جوزك واولادك تعبوكي او زعلوكي تعالي اقولك تعملي ايه دي صحتك بالدنيا والحياة مش مستاهلة.

كيف اتصرف مع جوزي وأولادي لو تعبوني أو زعلوني

– لكل ام او زوجة بتحب انها تريح جوزها واولادها وعارفة ان ده دورها في الحياةوانا بقولك لاء طبعا ده مش دورك فى الحياة، تعالى اقولك دور الزوجة  ايه اللي ربنا امرنا بيه ورسولنا الكريم عليه افضل الصلاة والسلام:

دورك انك تبقي زوجة تصون شرف جوزها وبيته وتحترمه في غيابه ووجوده وتؤدي طلباته الزوجية.

اما دورك كأم انت مدرسة لاطفال لازم تربيهم صح على القيم والاخلاق الحميدة، واكيد مش لوحدك انتي وجوزك اللى هو والدهم ومسؤل زيك بالضبط عن تربيتهم وتقويمهم.

طيب انا ساعات كتير جوزي او اولادي بيتعبونى ونفسيتي تعبت مش عارفة اعمل ايه؟

ارد عليكي واقولك نبتدى بالزوج

زوجك تعبك ازاي طول الوقت طلبات واهمال ومش بيقعد معاكي ولا بيحسسك بانك مراته حبيبته طيب انتي شكلك على اكمل وجه بمعنى انك مش مهملة فى نفسك ولا ريحتك بصل وتوم ولبسك حلو في البيت ومغرى لزوجك

وطبعا مش لازم لانجيري انا قصدي بتلبسي في البيت جينز واستريتش وتيشرتات شيك بناتي زى اللى بيشوفهم في الشارع اه سمعاكي بتقولى بيشوفهم اه كل الرجالة بتبص ولو النظرة الاولى لانه هيقولك النظرة الاولى ليا طيب انت تمام وشكلك كيوت فى البيت

كمان لما بيجي من الشغل بتقعدي تشتكيله من العيال وشغل البيت وووو، ولا بتقابليه بابتسامة ولو من ورا قلبك وتستني ساعة روقان وتقعدوا سوا ايه انتي تمام في الموضوع ده.

بس المشكلة بيسيبك ويخرج مع اصحابه ويسيب الحياة تضرب تقلب ولا همه حاجة

متزعليش

معلش متزعليش منى ما هو انتي السبب، اه انتي السبب من الاول محملتهوش مسؤليته كأب وزوج اللي هي انه مسؤل عن تقويم اولاده

مدام رجع من الشغل واكل وارتاحله ساعه، تاخديه من ايده كده وتروحي غرفة نومك وتقوليله انا عاوزاك تساعدني في تربية اولادك بدون استهزاء او اهمال ولادنا

دول الشجرة اللي بنزرعها وربنا هيحسابنا اذا فشلنا في تربيتهم، ده غير انهم هيتعبونا اما يكبروا لو ما احسناش تربيتهم

اه والله زي ما بقولك كده، بس تقوليله بنبرة حازمة ومن غير زعيق ولا صوت عالى عشان ميسبش المشكلة ويقولك وطى صوتك

قوليله انا محتجاك انت سندي وجوزي لازم نتفق نشيل تربية الاولاد سوا (الرجالة على فكرة بيحبوا يسمعوا الكلام ده من زوجاتهم )

مفيش مانع لو قولتي الكلام اللي يحب يسمعه عشان متشليش الهم لوحدك ساعتها هيحس بقيمتك وقيمة الولاد

-طيب جوزك بيبص على دي ويكلم دي وبيخرج مع اصحابه اتنازلي شوية ورجعيه بدل متقعدي تزعلي وتركبك الامراض وانتي اللى هتخسري صحتك في الاخر وهو بكده هتقدمنيه لعروسة جديدة مفيش راجل بيعمل زي الافلام اقل كلمة هيقول حقه الشرعي

اهتمي بنفسك ودلعيه ابعتيله رسالة حب صغيرة بس مثيرة ومفيش مانع تكون مثيرة ما انتي مراته اه والله زي مابقولك مباح تاخدي راحتك في الكلام مع جوزك حلالك

ارجوكي ارجوكي بلاش مكالماتك اللي كل ساعة انت فين وبتعمل ايه حتى لو وحشك وبتتحججي عشان تسمعى صوته متخفيش مش هيتخطف

حطي دايما فى بالك انك انسان متعرفيش علم الغيب ولا تعرفي بيعمل ايه سيبيها على ربنا مسيرك تعرفي بس في الوقت اللي يحدده ربنا ليك لحكمه يعلمها الله

متتصوريش انك اما تسأليه انت فين وهو مع واحدة ست هيعترفلك ويقولك انا مع واحدة فايه لزمته السؤال خليه يدور عليكي ويتصل بيكي متتصليش انتي الا لو فى ظرف طارق او حاجة مهمة

اتقلي ووفرى مكالماتك وبلاش تحكي مشاكلك لحد حتى لو والدتك اللي بتحبك لانها هتخاف عليكي وتقولك تصوراتها

اتقلي بجد خليكي تقيلة ورزينة ولو امامه بس عشان يشتاق لك على فكرة حتى لو بيعرف واحدة غيرك لا قدر الله هيدور عليكي لانك ببساطة كده انتي مراته وحبيبته حتى لو متصور انه مش بيحبك خلاص

خليكي ذكية

خليكي زكية واعرفي مواطن ضعف جوزك واشتغلي عليها والبكاء مش هيعمل شيء واى راجل فى الدنيا يحب مراته انثى حتى لو عنده سبعين سنة مش بالشكل بالتصرف

الصوت العالي هيجيب نتيجة اقولك اه هيجيب نتيجة عارفة ايه اعصابك واحبالك الصوتية هتبوظ مع الوقت وهتتعبي وهما هيتعودوا على كده وهو هيتفش من البيت عرفتي بقا النتيجة طيب واللامبالاة اللى عند الازواج نعمل فيها ايه اقولك انا بلاش كل حاجة تاخديها على اعصابك وتزعلي او تعملي بسرعة الاكل عشان جوزك جاي يلحق ياكل وينام عشان ينزل مع اصحابه

اعملي حاجتك على مهلك منين ما تخلص وقوليله ساعدني طيب لو جوزك بيرجع تعبان جدا وشغلته صعبة تفضلا منك تشيله عنه بس يوم اجازته تتفقوا يساعدك ويبقى متواجد فى البيت لانه حقك.

اولادك

حالة التناحة والاهمال وعدم المذاكرة وعدم سمعان الكلام والمشاكل اللى بيعملوه بالبيت والمدرسة بلاش تزعقى وتاخدى كله على اعصابك ما هو انتي لو بتحبيهم خافي على صحتك لانك اذا تعبتي لا قدر الله ولادك هيضيعوا من غيرك وكمان صحتك بالدنيا

طيب نعمل ايه اقولك

لازم لازم تبقي ست قوية الشخصية بلاش الاستكانة واه ياني ومش عارفة اعمل ايه وتصوتي وتزعقي ومفيش فايدة ولما ابوكو يجي كل الحاجات دي بتخليهم يعندوا اكتر خلي شخصيتك قوية وقعديهم وقوليلهم في قوانين جديدة اللي مش هيلتزم هيتعاقب واللى هيلتزم هجمعله نقط واخر الشهر هكافىء بمكافأة معنوية او مادية حسب ظروفك

حطي لهم جدول يومي يلتزمو بيه من اول ما يصحوا ويرتبوا السرير ويغسلوا اسنانهم ويتوضؤا للصلاة حتى لو سنهم اقل من سن الصلاة يتعودوا لحد ما يرجعوا من المدرسة ويعلقوا ملابسهم ويكتبوا الواجب حتى اللعب له وقت معين لا يتخطوه وينضفوا بعد اللعب ويرتبوا اللعابهم

كمان مفيش حاجة اسمها طفل عنده 4 سنين يأكل فى طبقه وميروحش يفضي البواقي فى سلة المهملات ويضع الطبق والملعقة على الطباخة او الرخامة او حوض الغسيل ولو طفل عنده 7 سنين يغسل طبقه ويساعدوكي في تنضيف السفرة بعد الاكل وتحضير الاكل كمان

متتعبيش نفسك كل يوم

مفيش حاجة اسمها كل يوم اطبخ ازاي يعني مصاريف كتير وتعب عليكي كما فى اختراع اسمه ساندوتشات جبنة وعسل ومربى اوتونة او حتى رنجة و لو ظروفك كويسة ممكن تدلعي نفسك بيوم اكل جاهز وجوزك لو جه يوم ولاقى الغدا جبنة بالطماطم وعيش وبطاطس محمرة مش هيتكلم

ولو اتكلم قوليله العيشة غالية وبنلم ايدنا شوية او كنت مشغولة ومطبختش الغسيل مش كل يوم جمعي كمية وخصصي ليها يوم تكوني عندك اكل بايت واو غدا خفيف زي موضوع الجبنة تحايلي على الموقف وبلاش شدة الاعصاب

علمي ولادك المسؤلية من صغرهم عشان يريحوكي ويدعولك لما يكبروا وطبعا بلاش تقوفيلهم على الواحدة واي غلطة لازم يتحاسبوا وانتقادات وشتيمة فوتي حاجة بسيطة مثلا كسر كوب بدون قصد عادى فداه

اعرفي انك انسانة مش الة ولو الة الالة لازم ترتاح عشان متفسدش اعملي لنفسك يوم دلع ولو حتى مرة كل شهر تروحي تشتري حاجة او حتى تقعدي في البيت بدون التزامات

ولادك عندهم اكلهم مجهزاه ويوم اجازتهم من المدرسة تقعدي تشربي نسكافيه تستمعي لحاجة بتحبيه تتعاملي مع اي موقف ببرود تعاهدي نفسك انك اليوم ده مش هتتعصبي تعرفي اولادك ان العقاب مضاعف للي هيغلط

وطبعا العقاب يكون حرمان من حاجة بيحبوها مصروف  او خروج او يقعدوا فى غرفتهم وهكذا اعرفي حاجة واحدة وبس محدش هينفعك لو جرالك حاجة لا قدر الله من الاخر كده

صحتك بالدنيا

بقلم \ اشجان كريم