تكثر فى هذة الايام المشاكل الزوجية والخلافات الاسرية لكن لضمان زواج سعيد تعالى اقولك على شوية نصائح لزواج سعيد لازم تأخذى بالك منها من الاول .
نصائح لزواج سعيد
1-لازم تبقى متأكدة ان مفيش حد بيتغير بعد الجواز، لو مش عاجبك دلوقتي صدقينى مش هايعجبك بعدين
2- خدى بالك فيه حياة عملية بتبتدي بعد الفرح والزفة والكوشة، الحاجات دي احتفال بالبداية مش بالوصول للغاية
3- المؤخر والقايمة والنيش والشبكة السوليتير والفرح الفخم والهني مون مش ضمانات على الاطلاق لنجاح الجواز
4- لو مش حاسين إنكم أصحاب وبينكم اهتمامات مشتركة وانسجام غالباً هاتبقوا تعساء
5- نصائح الخالات والعمات والجدات والجارات غالبا بتودي في داهية فدخليها من هنا وطلعيها من الناحية التانية
6- ما تخلفوش أول ما تتجوزوا على طول علشان اول فترة فى الجواز بتكون محتاجة وقت تطبعوا على بعض اكتر
7- ما تسكتيش على العنف اللفظى او البدنى او اى نوع من الاهانات او العنف
8- ما تتجوزوش علشان كل الناس بتتجوز أو علشان سنكم كبر، او لان الناس بتحرجكم أو أهلكم نفسهم
يشيلوا عيالكم، إنتوا مش مصدر للحيوانات الأليفة الآدمية، وأهلكم مش هايفرحوا لو اضطروا يشيلوكم إنتوا وعيالكم ومشاكلكم
9- اوعى تنسى انك مش بترتبطى بشخص بس لكن انتى بترتبطى بشخص وصفاته وطبيعته وعيلته بقية عمرك
10- ماتسمعوش كلام الناس اللي بتخزي العين وتشتكي وتخوفكم وتحبطكم، الجواز حلو لو مع الشخص الصح
وبظروف ترضي ربنا ولو كنتم فعلا كل واحد فيكم بيحاول يرضى الطرف التانى ويعمل كل حاجة علشان يكون مبسوط
نصائح لزواج سعييد
11- لو الطلاق حل خدوا قرار شجاع وما تخافوش من الناس، خافوا من ربنا اللي هايسألكم ضيعتوا حياتكم في إيه
12- اللي مش قد العيال ما يخلفش أحسن بدل ما يندم طول عمره ويقابل ربنا بذنب كبير
13- خدى بالك الجواز الفاشل ما بيتصلحش بإنجاب مزيد من الأطفال
14- الجواز الفاشل ما بيتصلحش بتجاهل مشاكله، يا تتفاهموا يا تتفارقوا
15-مش عيب انكم تطلبوا مساعدة في فك الاشتباك من ناس حكيمة وبتحبكم وخايفة على مصلحتكم
16- مش عيب انه لو فى مشاكل صعبة انكم تلجأوا لمستشار متخصص فى العلاقات الزوجية
17- هاجروا . إنتوا مش شجر إنتوا بني آدمين عندكم رجلين
18- طلب الرزق في مدينة أو بلد تانية مش عقوق، واللي يحسسك بكده يبقى ده ابتزاز عاطفي
19- ولادك مش امتداد لك ولا مفروض يحققوا اللي انت معرفتش تحققه. سيبهم يعيشوا زي ما انت عشت بمزاجك وبطريقتك
20- حبوا بعض بجد. افرحوا واضحكوا وإلعبوا مع بعض زي العيال علشان اليوم اللي بيفوت مبيرجعش تاني
