رمضان دايما بيكون فيه عزومات ولمة جميلة بيتلم فيها العائلة والاصحاب بس ست البيت بتشيل هم العزومة وتعبها وانها مبتعرفش تستقبل الضيوف لانها مشغولة بالمطبخ هنقدملك نصائح لعزومات رمضان روعة تسهل عليكى ان شاء الله العزومة مهما كانت كبيرة
نصائح لعزومات رمضان روعة تسهل عليكي كتير
– أولا اقعدي مع نفسك .
الاستعداد للعزومة بيكون قبلها بيومين بإنك بتقعدي مع نفسك كده وتشوفي عدد المعزومين قد إيه؟؟؟
وعلى الأساس ده بتحددي كمية الأكل اللي إنتِ هتعمليها
وخدي بالك إن لو كان عدد المعزومين قليل يعني مثلا 3 أفراد هيبقى عدد الأصناف قليل ومحدود
-لكن لو عدد المعزومين كبير هيبقى فيه تنوع في الأصناف المقدمة وده علشان ترضي جميع الأذواق.
– ثانيا هاتي ورقة وقلم.
بعد ما حددتي عدد المدعوين للعزومة هاتي ورقة وقلم واكتبي قائمة بالأصناف اللي المفروض تكون موجودة على السفرة.
ودي نسخة من القائمة اللي ممكن إنك تعمليها في أي عزومة.
1- السلاطات
شوفي يا ستي المفروض يكون عندك على السفرة في أي عزومة نوعين من السلطات وليكن مثلا طبق سلطة طحينة وطبق سلطة خضراء
2- الشوربة
كفاية قوي في عزومة رمضان وجود نوع واحد من الشوربة خاصة كمان لو كان عدد المعزومين مش كبير.
3- اللحوم
طبق اللحوم ده بيعتبر من الأطباق الرئيسية على السفرة علشان كده لازم يكون على السفرة في أي عزومة نوعين من اللحوم وليكن مثلا طبق بوفتيك لحمة وطبق فراخ مشوية
4- النشويات
النشويات زي الرز أو المكرونة أو الرقاق أو المحشي وخدي بالك إن المفروض يكون على السفرة نوع واحد من النشويات.. يعني إما مكرونة أو رز مش معقول الاتنين
5- الخضار
كفاية قوي صنف واحد من الخضار على السفرة خاصة إن الإقبال على الخضار بيكون مش كبير قوي في العزومات
6- الحلويات
أكيد لو عندك عزومة هتقضي وقت كبير جدا في عمل الأكل علشان كده اختاري الحلويات السهلة في التحضير أو اختاري الأصناف اللي ممكن إنك تعمليها قبلها بيوم.
زي البسبوسة أو أي نوع من الحلويات اللي بتتقدم باردة زي الآيس كريم..
ثالثا التحضير الفعلي للعزومة
بعد ما جهزت قائمة بالأصناف اللي إنتِ ناوية تعمليها في العزومة عليك ببدء التحضير الفعلي للعزومة وخدي بالك إنك تحضري ده قبلها بيوم.
طبعا هتسألي نفسك دلوقتي وتقولي ازاي أحضر الأكل قبلها بيوم كده الأكل يبوظ خاصة إن الجو حر
**دي الحاجات اللي ممكن إنك تعمليها قبل العزومة بيوم.
1- العصائر ممكن إنك تعمليها وتحطيها في كوباية العصير وتحطيها في التلاجة أو تحطيها في أكياس
وتحطيها في الفريزر وتطلعيها قبل المغرب بخمس ساعات
2- جهزي أدوات المطبخ بتاعتك زي الصواني والأطباق والكوبايات والكاسات واتأكدي من نظافتها بحيث إنها تكون جاهزة على الاستعمال
3- لو هتعملي محشي ممكن إنك تجهزيه وتلفيه وتحطيه في التلاجة بحيث يكون جاهز على التسوية يوم العزومة
نصائح لعزومات رمضان
4- لو هتقدمي في العزومة لحمة أو فراخ مشوية ممكن أنك تتبليهم ببصل قبل العزومة بيوم وتحطيهم في طبق بلاستيك
وتسيبيهم في التلاجة بحيث يكونوا جاهزين على الشواء يوم العزومة
5- لو هتعملي مكرونة بالبشاميل أو جلاش باللحمة المفرومة يبقى ياريت إنك تعصجي اللحمة قبلها بيوم
6-الحلويات ممكن إنك تعمليها قبل العزومة بيوم وتحطيها في التلاجة ومن الحلويات اللي ممكن إنك تعمليها الآيس كريم والبسبوسة والبقلاوة وخدي بالك إنك تغطي صينية البسبوسة أو البقلاوة كويس
– رابعا يوم العزومة نفسه
-أكيد لو جهزت الحاجات دي زي ما قلت ليكى هتقومي يوم العزومة أعصابك مستريحة جدا وهتبدئي في إنك تخرجي الحاجات اللي إنتى جهزتيها من التلاجة وتسويها وفي الوقت اللي الحاجة فيه بتستوي ممكن إنك تعملي السلطة.
-وخدي بالك إنك تحطي الأكل اللي هيستوي بدري في أواني حرارية علشان يفضل محتفظ بسخونته
-وبكده فعلا هتخلصي كل حاجة قبل أذان المغرب بساعتين وهتقدري تستقبلي ضيوفك وإنتى أعصابك مستريحة قوي
-وما تنسيش نيتك فى كل عزومة.إفطار الصائم ثوابه كبير أوى .وتفكرى ماما لو انتى مش شاطرة وكل عام وانتم بخير.
