كب كيك البيتزا ، وصفة سهلة جداً وبسيطة في تشكيلها ، مناسبة للاطفال والكبار وحلوة اوى اوى كمان فى الحفلات وبتنجز فى الوقت .
كب كيك البيتزا بالصور أكيد روعة
المقادير :
- 200جم دقيق [ 2 كوب ]
- 200 مم لبن [ 1 كوب ]
- 1 بيضة
- ملح , فلفل اسود , زعتر
- 50 مم زيت [ 1/3 كوب ]
- 1/2 باكو بيكنج بودر
- 1 كوب جبنة رومى مبشورة
- 1/2 كوب جبن شيدر مبشورة
- 1/2 كوب زيتون شرايح
- 1/2 كوب فلفل احمر مقطع كارو
- 1/2 كوب فلفل اخضر مقطع كارو
- 1/2 كوب فلفل اصفر مقطع كارو
- 1 كوب سوسيس مقطع [ ممكن لانشون او تونة او بسطرمة ]
الطريقة:
1. نخلط اللبن و البيضة و الملح و الفلفل و الزعتر و الزيت مع بعض و نقلبهم كويس بمضرب سلك
2. نضيف ليهم الدقيق و البيكنج بودر و نقلب كويس بمضرب السلك لحد ما يختلط كويس ويبقى انسيابى
3. و نضيف عليه الخضار المقطع و الزيتون و الجبنة الرومى بس و السوسيس و نقلب كويس
4. و نجيب صينية كب كيك و نقص ورق زبدة دواير صغيرة على اد قاع وحدات الكب كيك بس او نستعمل ورق الكب كيك وندهنه كويس جدا علشان بيلزق فيه انا عملته اول مرة فى ورق الكب كيك و لزق ] و ندهن القوالب و الورقة كويس جدا بالزيت
5. و نملا القوالب بالخليط اللى عملناه للاخر لانه مش بيرتفع قوى زى الكب كيك الحلو
6. و ندخلهم الفرن 200 درجة الرف الوسط و لما يجمد و قبل وشه ما يحمر نخرجه و نرش على وشه الجبنة الشيدر و شريحة زيتون للزينة و ندخله الفرن تانى لحد ما وشه يحمر
وبالهنا
