هناك تتبيل المشويات بعدة طرق لكن نظل نبحث عن مذاق مميز يشبه ما نتناوله في المطاعم . وعن تجربه هنقدم تتبيله مشويات كفته وفراخ بطعم جنان . جربيها وهتبقى دى تتبيلتك المفضله.
تتبيل المشويات كفتة وفراخ
اولا: مشويات الفراخ:
- فرخه مخليه ومقسمه حسب العدد
- ملعقة كبيره بهارات دجاج
- ملعقة صغيره بابريكا
- ملعقه صغيره هوت صوص ” صوص الشطه او شطه بودر “
- ملعقة صغيره كاتشب
- ربع كوب عصير ليمون
- ربع كوب ماء بصل ” ابشرى البصل واعصريه بأيدك وخدى الميه اللي نزلت بس وسيبى التفل هتبلى بيه الكفته
- ملح ,فلف
- ملعقة صغيره زعتر طازج
2 ملعقة زيت ” عشان تدى المشويات لمعان وتخليها طريه مش ناشفه “
الطريقة:
- في طبق عميق حطى كل المقادير دى مع بعض وقلبيها كويس خالص حتى يمتزجوا معا وحطى عليها قطع الفراخ
- ودلكى الفراخ كده عشان تشرب التتبيله وسبيها على الاقل 4 ساعات او طول الليل في الثلاجة
- بعد كده على شوايه سخنه جدا اشويها لو الشوايه مش سخنه هتنشف الفراخ عليها لكن لازم سخنه عشان تاخد الفراخ صدمه وتقفل مسامها وتبقى طريه من جوة .
ثانيا : مشويات الكفته
- ربع كيلو لحم مفروم
- كوب برغل منقوع ومتصفى لو معندكيش ممكن فول صويا او عيش فينو منقوع في ماء
- تفل البصل اللي طلع من الخطوة الاولى بعد ما تبشرى البصله اعصرى منها الميه وخدى الباقى نتبل بيه الكفته
50 جرام ليه ضانى:
- تشتريها من عند الجزار وتحطيها في الفريزر تتجمد وبعدين طلعيه وابشريها على اللحم
- ملعقة كبيره بهارات كفته
- ملح ، فلفل
الطريقة:
- في طبق عميق برضوا اخلطى اللحم المفروم مع كل المقادير
- صبعيها على اسياخ خشب او صوابع عاديه ودخليها التلاجه ساعتين كده
- طلعيها وحطيها على شوايه سخنه وقلبيها كل شويه من كل النواحي وبالف هنا.
