نصائح لـ حماية الطفل من المتحرشين

أنتشرت في الفترة الأخيرة ظاهرة التحرش والاغتصاب وخصوصاً التحرش بالأطفال، لذلك نقدم لكم  نصائح لـ حماية الطفل من المتحرشين.

نصائح لـ حماية الطفل من المتحرشين

 توعية الطفل مليون مرة وأرجوكي ماتزهقيش من التكرار وتعتبري انه فهم، كرري دايماً الكلام دا:
1- محدش يلمسك خالص.
2- لو حد غريب لمسك صوت واصرخ وزقه.
3- تعالي قول لماما او اي حد كبير
4- عرفية الأجزاء الخاصة في جسمة وان محدش ينفع يشوفها ولا يلمسها.
5- لازم تدافع عن نفسك لو حد ضايقك.
6- متخافش لو حد ضايقك تعالي قولي.
7- ماما وبابا بيحبوك وهايدافعوا عنك.
8- جسمك دا ملكك لوحدك محدش من حقة يلمسه.
9- محدش يحضنك من قدام او من ورا ولا تقعد علي حجر حد.

10- عدم الضغط علي الطفل لإرضاء الكبار مش عايز يسلم مايسلمش، مش عايز يبوس مايبوسش، مش عايز يتزغزغ يصوت ويبعد ايد عمو او طنط ويقولهم لا. و انتي ماتلمهوش. احسن انه يتقال علي أولادك مش متربين من أنهم يتعرضوا للتحرش انا مع احترام الطفل للكبار بس برضة مع احترام الكبار للطفل.

11- الإتفاق مع الطفل قبل النزول من المنزل أو العربية إنة يفضل جنبك وفى إيدك طول الوقت علشان إنتي بتحبية وكمان محتجاة يساعدك في شرا الحاجات.

12- إبنك أو بنتك في إيدك طول الوقت أو ركبية فى العربية بتاعت السوبر ماركت مهما إتضايق أو صرخ أو إعترض ماتسيبهوش يسيب إيدك أو العربية وفهمية بالراحة إنتى بتعملى كدا ليه. بيفرق قوى لما بنفهمه السبب و نشارك الطفل في المسئولية.

13- برجوا كل الأمهات إنها تصاحب أولادها وتطول بالها عليهم. أنا عارفة إن الأم بيبقي فوق كتافها عبء كبير و مسئوليات كتير بيخلوها دايماً مضغوطة. بس انا برجوا كل أم رغم الضغط الكبير، اللي ربنا يعينك عليه، خليكي هادية علي قد ما تقدري مع العيال.

شفت حالات كتير جداً جداً أطفال تتعرض للتحرش وبتخاف تروح تحكي علشان خايفة ماما او بابا يضربوها. دي من اكتر الحاجات اللي بتألمنى أنا شخصياً. ان الضحية بيلوم نفسة وبيعتقد إنه أخطأ ومابيحكيش ودا له أثر نفسى سيء جداً. نصاحب عيالنا علشان مايخافوش يقولوا لنا أى حاجة وكل حاجة مهما كانت.

علمي طفلك لو اتعرض لاي حاجه مش عايزها: تحرش، عنف، عض، او غيرة يمشي ٣ خطوات:

أولاً: يقول بصوت عالي جدا: (مبحبش كدا) ودربية عليها علشان لما تسمعية بيقولها تفهمي فوراً ان في حاجة.

ثانياً: تانى إجراء لو اللي قدامة مبطلش بعد (مبحبش كدا) ولسة بيضايقه وهيمد ايده باي صورة انه يمسك ايده ويصرخ بصوت عالي ( لااا).

ثالثاً: والإجراء الأخير لو لسه المعتدي سواء كبير أو صغير مبطلش ان الطفل يجري بسرعه علي اول شخص كبير ويقوله.

• – لـ حماية الطفل من المتحرشين  مايلعبش عند الجيران.
• لو جالك ضيف يبات، ولادك يباتوا جنبك علي الارض و لا في اي حتة بس لازم معاكي في الاوضه.
• طفلك مايبتش برة البيت تحت اي ظرف او اي عند حد مهما كان.
• الرجالة بتتحرش بأطفال صبيان زي ما بتتحرش بالبنات عادي جداً. وبرضة في ستات بتتحرش بستات.

مش قصدي اخوفك، بس بوعيكي وفي إحصائيات ودراسات عن التحرش والإغتصاب وعندي كمية قصص عن عملاء إتعرضوا لتحرش لو حكيتلك مين اللي عمل فيهم كدا و ازي، شعرك هيشيب.

ربنا يحفظ ولادنا ويبارك لنا فيهم

بقلم  د/ سيهار صلاح الدين