وصفات حلويات دايت

حلويات دايت لو رجيم  أو متبعة نظام غذائي ولو بتحبي الحلويات ومش عايزة تتخني ولا تزعلي هنقدم لكي وصفات حلويات دايت قليلة الدهون لذيذة جدا وفي نفس الوقت هتاكلي منها من غير ما تخافي ان وزنك يزيد لان كل صنف نسبة الدهون فى القطعة الواحدة منه اقل من 10 جرام.

وصفات حلويات دايت

كريم كراميل جوز الهند والاناناس:

المقادير:

• 1/3 كوباية سكر.
• 3 معالق كبيرة مية.
• 3 بيضات كبيرة.
• 1 بياض بيضة كبيرة.
• 1 2/3 كوباية لبن قليل الدسم.
• ½ كوباية سكر.
• 1/3 كوباية كريمة جوز الهند.
• 2 معلقة صغيرة فانيليا.
• 1/8 معلقة صغيرة ملح.

طريقة التحضير:

1. اخلطي السكر مع المية في طاسة على نار متوسطة وقلبيهم لحد ما السكر يدوب واللون يتحول لدهبي تقريبا هتاخد 10 دقايق,
2. هاتي القوالب اللي هتعملي فيها ادهنيها زيت وصبي فيها خليط السكر لحد ما يغطي قاع القالب كله
3. في طبق اخلطي البيض وبياض البيض اضربيهم كويس مع بعض وبعدين ضيفي لهم اللبن والسكر وكريمة جوز الهند والفانيليا والملح وقلبي المكونات كويس مع بعض وصبيه بالتساوي على القوالب وحطيها في صينية
4. صبي في الصينية مية سخنة لحد 1/3 القالب كده ودخليهم الفرن على 325 درجة لمدة 50 دقيقة او لحد ما تختبريها وتحطي السكينة وتطلع نضيفة
5. طلعيها من الفرن وحطيها في التلاجة على الاقل 4 ساعات وبعدين اقلبيها على طبق وقدميها مع اناناس مقطع.
6. نسبة الدهون في القطعة: 6.9 جرام.

حلويات دايت كيكة مزدوجة بالكراميل:

مقادير الكيك:

• 1 ½ كوب مية مغلية.
• ¾ كوب كاكاو غير محلى.
• 1 ½ كوب سكر.
• 6 معالق كبيرة زبدة طرية.
• 1 معلقة صغيرة فانيليا.
• 2 بيضة كبيرة.
• 1 2/3 كوب دقيق.
• 1 معلقة صغيرة صودا الخبز “الكربوناتو”.
• ¾ معلقة صغيرة بيكنج بودر.
• ¼ معلقة صغيرة ملح.

الحشو:

• 2 معلقة كبيرة زبدة.
• ¼ كوباية سكر بني.
• من 2 – 3 معالق كبيرة لبن خالي الدسم.
• 2 معلقة صغيرة فانيليا.
• 2 كوب سكر بودرة

التزيين:

• 2/3 كوب كراميل خالي من الدسم.
• ¼ كوباية مكسرات محمصة ومفرومة.

طريقة تحضير الكيك:

1. اخلطي الكاكاو مع المية المغلية قلبيهم كويس وسيبيهم لحد ما يبردوا خالص.
2. اخلطي السكر والزبدة والفانيليا واضربيهم مع بعض بالمضرب الكهربا على سرعة متوسطة حوالي 5 دقايق، ضيفي البيض واضربيهم تاني, اخلطي الدقيق مع الكربوناتو مع البيكنج بودر والملح وقلبيهم مع بعض, وبعدين ضيفي خليط الدقيق والكاكاو لخليط السكر بالتبادل يعني ضيفي شوية من خليط الدقيق وبعدين شوية من الكاكاو وهكذا لحد ما تنتهي الكمية واخر اضافة تبقى خليط الدقيق.
3. هاتي صينية ادهنيها زيت وحطي ورق زبدة او ادهني ورق الزبدة بالزيت وحطيه في الصينية وبعدين صبي فيها العجين وحطيها في الفرن على درجة 350 لمدة 30 دقيقة او لحد ما تستوي وعدين نطلعها ونسيبها تبرد.
4. اثناء الفترة دي نحضر الحشو هندوب الزبدة في طاسة على نار متوسطة ونضيف لها السكر البني واللبن ونقلبها على النار لمدة دقيقة او لحد ما السكر يدوب ونرفعها من على النار ونسيبها تبرد شوية, وبعدين نضيف عليها الفانيليا والسكر البودرة بالتدريج ونضربهم مع بعض على سرعة متوسطة  لحد ما يبقى الخليط ناعم ولو لقتيها سميكة اوي ممكن تضيفي لها معلقة لبن وتضربيها لحد ما تبقى ناعمة وسمكها معقول.
5. اقطعي الكيك من النص خليها طبقتين وحطي نص الحشو بينهم ومن فوق حطي باقي الحشو ورشي عليها الكراميل والمكسرات.
6. نسبة الدهون في القطعة: 8.4 جرام.

خوخ بالزبادي:

المقادير:

• معلقة صغيرة فانيليا.
• 1 كوباية زبادي قليلة الدسم.
• 5 ½ معلقة سكر بني
• 1/8 معلقة صغيرة ملح.
• 3 معالق كبيرة لبن خالي الدسم.
• 4 ثمرات خوخ ناضجة طرية متقطعة نصين.

طريقة التحضير:

1. سخني الفرن على درجة حرارة 350
2. اخلطي السكر و الزبادي والملح واللبن والفانيليا قلبيهم مع بعض كويس
3. هاتي قالب صغير حطي فيه ورقة زبدة ورصي الخوخ وبعدين حطي عليه نص خليط الزبادي والسكر اللي حضرناه وحطيه في الفرن على درجة حرارة 350 لمدة 10 دقايق وبعدين طلعيه وحطي عليه باقي خليط الزبادي والسكر وحطيه 10 دقايق كمان لحد ما الخوخ يطرى, وممكن تشربي مع الطبق عصير اي نوع تفضليه.
4. نسبة الدهون: 1.8 جرام.