طبعا كلنا قرأنا العنوان ومستغربين احنا فى سنة كام عشان نعمل كده بس انا هقولكوا على فكرة حلوة تخلي عندكو خزين طول السنة هتسألوني عن كيفية شراء خزين السنة كلها بتكلفة أقل ؟ بكل بساطة هتفهموا
كيفية شراء خزين السنة كلها بتكلفة قليلة جداً
اول كل شهر احنا بنقبض تفتكري 50 جنيه هيأثروا معاكي ولا ساعات بنصرفهم على حاجات ملهاش لزمة طيب ما نستفيد منها ونخصص كل شهر 50 جنيه لخزين السنة
مثلا:
– البطاطس
الشهر ده البطاطس رخيصة ب 2ونص اجيب بالخمسين كلها بطاطس وانظفها واقشرها وتقطع صوابع ونقليها نصف قلية تفرز فى الفريزر فى اكياس كل كيس على اد الوجبة بس نشتريها كده زى الصورة عشان فلوسنا متروح على الارض وكمان ممنوع شراء البطاطس شهر 8 وشهر 9 لانها بتكون مخزنة بمبيدات
– موسم الفراولة
الفراولة وهى رخيصة ب 3جنية ونصف مثلا نجيب ب 50 جنيه نعمل نصها مربى والنص التاني ننظفه ونغسله ونشيله فى الفريزر للعصاير والكيك وطبعا المربى بتكون كمية الفراولة نصها سكر يعني
لو هتعملي كيلو فراولة ضيفي عليه نصف كيلو سكر ونصف عصير ليمونة وعلى نار هادية والتين كده نفس طريقة مربى الفراولة نفسها فى طريقة مربى التين
– الطماطم
اوقات الطماطم بتبقى رخيصة جدا ليه ال50 بتاعت الشهر اللى رخيصة فيه نخصصها للطماطم لانها فى اوقات اخرى من السنة بتوصل تمن الكيلو لعشرة جنية
هاتيها واعمليها صلصة او حطيها بعد غسيلها فى ماء مغلى عليه نصف ملعقة ملح ليمون واتركيها 2 دقيقة ثم اخرجيها على الماء البارد وبعد ان تبرد تقشر وتوضع فى اكياس على اد الطبخة وعلى الفريزر
– البسلة
البسلة لا نستغنى عنها طول السنة نخصص الشهر اللى البسلة رخيصة فيه ونشترى بال50 ج بسلة ونفرفتها بدون غسيل ونشيلها فى اكياس على اد الوجبة فى الفريزر
– المانجو
لما تكون رخيصة نجيبها نغسلها كويس ونشيل منها النواة ونحطها فى اكياس بقشرها كل كيس على اد العصير ووقت الشتا نطلعها ونضربها فى الخلاط مع السكر والماء وتصفى واشربى احلى عصير مانجا وبردوا بال50 ج
– البامية
نفس الموضوع هنشتريها الوقت ده كويس اوى هى دلوقت رخيصة هاتو بال50 ج وتقمع وتوضع فى ماء مغلي عليه نصف ملعقة ملح ليمون او عصير ليمون لمدة 3 دقائق وتنشل لتوضع فى ماء مثلج و بعد ان تصفى البامية وتجف توضع فى اكياس للفريزر واعملي احلى طواجن بامية فى الشتاء
– الثوم
وقت اما يكون رخيص نشتري التوم الاحمر زى الصورة او الوردى لان طعمها حلو ونقشره ونحطه فى اكياس
فى الفريزر بال50 جنيه وممكن نقسم ال50 جنيه على حاجتين مثلا بطاطس وثوم او اى حاجتين موجودين فى الشهر دة بسعر رخيص
– السمن البلدى
للى بيحبوه انسب وقت لشرائه وتخزينه شهر يناير نشترى كيلو سمن بقري ونخزنه فى الفريزر لرمضان طبعا الكيلو ب 30 ج او 35 نشترى بالخمسين كلها
– فى شهور فى السنة
مش بيكون فيها حاجة رخيصة او نازل عليها تخفيضات نعمل ايه نشترى زيت ومكرونة فراخ مجمدة توابل ونشيلها فى الفريزر مكسرات ونخزنهم هينفعو طبعا
بجد الحاجات دى هتنفع وهتفضل الثلاجة ممتلىء بكل الاكلات طوال السنة غير انك ممكن تحتاجي شيء او ميكونش معاكي فلوس تاخدي من الخزين وتعملي مثلا مكرونة وبطاطس محمرة وعندك الطماطم
والبطاطس والمكرونة والزيت او يجيلك ضيوف فجأة تطلعي مانجو او فراولة وتعملى بكل بسطاة ومش هتشيلى هم التنظيف وهيستغربوا من وجود الحاجات دى فى غير موسمها
ارجو ان تكون اعجبتكم الفكرة
